புதினின் பிடிவாதம்.. போப் லியோகண்ணீர்!.. கிறிஸ்துமஸ் போர் நிறுத்தத்திற்கு ரஷ்யா முட்டுக்கட்டை!

புனித கிறிஸ்துமஸ் திருநாளை முன்னிட்டு உக்ரைன் – ரஷ்யா இடையே போர் நிறுத்தம் செய்யப்பட வேண்டும் என்ற கோரிக்கையை ரஷ்ய அதிபர் புதின் நிராகரித்திருப்பது, தமக்கு மிகுந்த வருத்தத்தை அளிப்பதாக கத்தோலிக்கத் திருச்சபையின் தலைவர் போப் லியோ தெரிவித்துள்ளார்.

போப் லியோவின் வருத்தம்
இத்தாலியின் காஸ்டெல் காண்டோல்ஃபோவில் (Castel Gandolfo) உள்ள தனது இல்லத்திற்கு வெளியே செய்தியாளர்களிடம் பேசிய போப் லியோ, கிறிஸ்துமஸ் போர் நிறுத்தம் குறித்து ரஷ்யாவின் நிலைப்பாடு குறித்துப் பேசினார். “எனக்கு மிகுந்த வருத்தத்தை அளிக்கும் விஷயங்களில் ஒன்று, ரஷ்யா இந்த கிறிஸ்துமஸ் போர் நிறுத்தக் கோரிக்கையை நிராகரித்துள்ளதாகத் தெரிகிறது. புனிதமான இந்த நாளில் துப்பாக்கிகள் மௌனமாக இருக்க வேண்டும் என்று நான் விரும்பினேன்,” என்று அவர் உருக்கமாகத் தெரிவித்தார்.

மீண்டும் ஒரு கோரிக்கை
ரஷ்யாவின் இந்த அறிவிப்பால் மனம் சோர்ந்துவிடாமல், மீண்டும் ஒருமுறை அமைதிக்கான கோரிக்கையை ரஷ்யாவிடம் முன்வைக்கப் போவதாக போப் லியோ கூறியுள்ளார். “நல்லெண்ணம் கொண்ட அனைத்து மக்களிடமும் நான் மீண்டும் ஒருமுறை வேண்டுகோள் விடுக்கிறேன். குறைந்தபட்சம் நமது மீட்பரின் பிறந்தநாளான கிறிஸ்துமஸ் அன்றாவது ஒரு நாள் அமைதியைக் கடைபிடியுங்கள். ஒருவேளை அவர்கள் செவிசாய்த்தால், உலகம் முழுவதும் குறைந்தது 24 மணி நேரமாவது அமைதி நிலவும்,” என்று அவர் நம்பிக்கை தெரிவித்தார்.

ஏறத்தாழ 4 ஆண்டு காலப் போர்
கடந்த 2022-ம் ஆண்டு பிப்ரவரி மாதம் தொடங்கிய உக்ரைன் – ரஷ்யா போர், தற்போது நான்கு ஆண்டுகளை நெருங்கிக் கொண்டிருக்கிறது. இந்த நீண்டகாலப் போரில் பல்லாயிரக்கணக்கான உயிர்கள் பலியாகியுள்ளன. உலகத் தலைவர்கள் பலர் அமைதிப் பேச்சுவார்த்தைக்கு அழுத்தம் கொடுத்து வரும் நிலையில், கிறிஸ்துமஸ் போன்ற புனித நாட்களில் கூடப் போர் ஓயாதது மனிதாபிமான ரீதியில் பெரும் கவலையை ஏற்படுத்தியுள்ளது.

சர்வதேச நாடுகளின் பார்வை
அமெரிக்காவைச் சேர்ந்த முதல் போப் என்ற பெருமைக்குரிய போப் லியோ, பதவியேற்றது முதலே உலக அமைதிக்காகத் தொடர்ந்து குரல் கொடுத்து வருகிறார். உக்ரைன் அதிபர் ஜெலன்ஸ்கியைச் சமீபத்தில் சந்தித்த அவர், அமைதிப் பேச்சுவார்த்தையில் ஐரோப்பிய நாடுகளின் தலையீடு அவசியம் என்றும் வலியுறுத்தியுள்ளார். தற்போது புதினிடம் அவர் விடுத்துள்ள இந்த வேண்டுகோள், கிறிஸ்துமஸ் தினத்தில் ஒரு சிறிய மாற்றத்தையாவது ஏற்படுத்துமா என்று ஒட்டுமொத்த உலகமும் எதிர்பார்த்துக் காத்துக்கொண்டிருக்கிறது.

“புனித நாளிலும் போர் ஓயவில்லையே” என உலகெங்கிலும் உள்ள அமைதி விரும்பிகள் போப் லியோவின் கருத்திற்கு ஆதரவு தெரிவித்து வருகின்றனர். ‘அமைதி மலரட்டும்’ என்ற ஹேஷ்டேக்குகளுடன் போப்பின் இந்த உருக்கமான உரை இணையத்தில் வைரலாகி வருகிறது.

Leave a Comment