தமிழக அரசியல் வரலாற்றிலேயே இதுவரை கண்டிராத ஒரு மாபெரும் அதிர்வலையை Axis My India எக்சிட் போல் முடிவுகள் ஏற்படுத்தியுள்ளன. நடிகர் விஜய்யின் தமிழக வெற்றிக் கழகம் தனது முதல் தேர்தலிலேயே 98 முதல் 120 இடங்கள் வரை கைப்பற்றும் என்று கணிக்கப்பட்டுள்ளது, ஒட்டுமொத்த தேசத்தின் கவனத்தையும் தமிழகத்தின் பக்கம் திருப்பியுள்ளது.
234 தொகுதிகளை கொண்ட சட்டசபையில் ஆட்சி அமைக்க 118 இடங்கள் தேவை என்ற நிலையில், விஜய் தலைமையிலான கட்சி பெரும்பான்மைக்கு மிக அருகில் அல்லது அதை தாண்டியும் செல்லும் என்ற இந்த தகவல், பாரம்பரிய திராவிட கட்சிகளின் அடித்தளத்தையே ஆட்டங்காண செய்துள்ளது.
குறிப்பாக, பிரதீப் குப்தா வெளியிட்டுள்ள இந்த தரவுகள், தமிழகத்தில் ஒரு ‘அரசியல் சுனாமி’ உருவாவதை கோடிட்டு காட்டுகின்றன. இந்த எக்சிட் போல் முடிவுகளின்படி, ஆளுங்கட்சியான திமுக 92 முதல் 110 இடங்களுக்குள் சுருங்கும் என்று கணிக்கப்பட்டுள்ளது. திமுக மற்றும் தவெக ஆகிய இரு கட்சிகளுமே தலா 35 சதவீத வாக்கு வங்கியை பகிர்ந்துகொள்ளும் என்பது, இருமுனை போட்டியிலிருந்து தமிழகம் விலகி, ஒரு புதிய அதிகார மையத்தை நோக்கி நகர்வதை உறுதிப்படுத்துகிறது.
குறிப்பாக, 18 முதல் 39 வயது வரையிலான இளைஞர்கள் மற்றும் பெண்களின் பெரும் ஆதரவு விஜய்க்கு சாதகமாக மாறியுள்ளது. ஆளுங்கட்சி மீதான அதிருப்தி ஓட்டுகள் அதிமுகவிற்கு செல்லாமல், நேரடியாக தவெக-விற்கு தாரைவார்க்கப்பட்டதே இந்த எதிர்பாராத வெற்றிக்கு காரணம் என்று அரசியல் வல்லுநர்கள் சுட்டிக்காட்டுகின்றனர்.அதிமுகவை பொறுத்தவரை, இந்த எக்சிட் போல் முடிவுகள் ஒரு பேரதிர்ச்சியாகவே அமைந்துள்ளது. வெறும் 22 முதல் 32 இடங்கள் வரை மட்டுமே அக்கட்சிக்கு கிடைக்கும் என்ற கணிப்பு, அக்கட்சியின் வாக்கு வங்கி மிக மோசமாக சரிந்துள்ளதை காட்டுகிறது.
எம்.ஜி.ஆர் மற்றும் ஜெயலலிதாவால் கட்டிக்காக்கப்பட்ட கோட்டை, இன்று ஒரு புதிய வரவால் தகர்க்கப்பட்டு வருவதை உணர முடிகிறது. அதிமுகவின் வாக்குகள் ஒட்டுமொத்தமாக தவெக-வை நோக்கி திரும்பியுள்ளதால், எதிர்க்கட்சி என்ற அந்தஸ்தையே அதிமுக இழக்கும் அபாயம் நிலவுகிறது. இந்த தரவுகள் உண்மையானால், இது அதிமுகவின் அரசியல் எதிர்காலத்திற்கே ஒரு பெரும் கேள்விக்குறியாக அமையும்.
தமிழகத்தில் ஒரு ‘தொங்கு சட்டசபை’ உருவாவதற்கும் அதிக வாய்ப்புகள் உள்ளதாக விவாதங்கள் எழுந்துள்ளன. தவெக மற்றும் திமுக ஆகிய இரு கட்சிகளுமே பெரும்பான்மைக்குத் தேவையான 118 இடங்களை பிடிக்க தவறினால், 20 முதல் 30 இடங்களை வைத்துள்ள அதிமுக, ஆட்சியை தீர்மானிக்கும் சக்தியாக மாறும். அப்படி ஒரு சூழல் ஏற்பட்டால், விஜய்யுடன் அதிமுக கைகோர்க்குமா அல்லது திமுக தனது கூட்டணி கட்சிகள் மூலம் தந்திரமாக ஆட்சியை தக்கவைக்குமா என்பதே மில்லியன் டாலர் கேள்வியாக உள்ளது.
எக்சிட் போல் முடிவுகளின் உயர் எல்லையான 120 இடங்களை விஜய் தொட்டால் மட்டுமே அவர் தனித்து ஆட்சி அமைக்க முடியும்; இல்லையெனில் தமிழகம் ஒரு புதிய கூட்டாட்சி முறையை சந்திக்க வேண்டியிருக்கும். திரைப்படங்களில் வரும் ‘மாஸ்’ காட்சிகளை போலவே, விஜய்யின் அரசியல் வருகையும் ஒரு மிகப்பெரிய எதிர்பார்ப்பையும் பரபரப்பையும் ஏற்படுத்தியுள்ளது.
பிரதீப் குப்தா விஜய்யை ஆந்திராவின் என்.டி.ஆர் மற்றும் தமிழகத்தின் எம்.ஜி.ஆருடன் ஒப்பிட்டுப் பேசியது, இந்த மாற்றத்தின் வீரியத்தை புரிய வைக்கிறது. “லேட்டா வந்தாலும் லேட்டஸ்ட்டா வருவேன்” என்ற ரஜினி வசனத்தை போல, தேர்தல் களத்தில் கடைசியாக நுழைந்தாலும், முடிவுகளில் முதலிடத்தை பிடிக்க விஜய் தயாராகிவிட்டார் என்பதையே இந்த எக்சிட் போல் முடிவுகள் சொல்கின்றன.
மே 4-ம் தேதி தேர்தல் முடிவுகள் வெளியாகும்போது, தமிழகம் ஒரு புதிய முதலமைச்சரை தேர்ந்தெடுக்குமா அல்லது அரசியல் குழப்பங்களில் மூழ்குமா என்பது தெளிவாக தெரிந்துவிடும். ..