எல்லாமே நல்லாதான் இருக்கு… ட்விஸ்டுடன் சூப்பர் 8-க்கு முன்னேறிய இங்கிலாந்து!

ஆஸ்திரேலியாவுக்கெதிரான டி20 உலகக் கோப்பை லீக் போட்டியில் ஸ்காட்லாந்து அணி 5 விக்கெட் வித்தியாசத்தில் தோல்வியடைந்த நிலையில், ரன் ரேட் அடிப்படையில் இங்கிலாந்து அணி சூப்பர் 8 சுற்றுக்கு முன்னேறியது.

குரூப் பி-யில் இருந்து சூப்பர் 8 சுற்றுக்கு முன்னேறும் அணி இங்கிலாந்தா, ஸ்காட்லாந்தா என்கிற கேள்விக்கு விடை கிடைத்திருக்கிறது. நமீபியாவுடனான கடைசி லீக் போட்டியில் வெற்றிபெற்றே ஆக வேண்டும் என்கிற நிலையில் இங்கிலாந்து களமிறங்கியது. ஆனால், போட்டி கைவிடப்பட்டாலோ தோல்வியடைந்தாலோ லீக் சுற்றோடு வெளியேற வேண்டிய நிலை.

இந்த நிலையில், மழையால் 10 ஓவர்களாகக் குறைக்கப்பட்ட போட்டியில் முதலில் பேட் செய்த இங்கிலாந்து 122 ரன்கள் குவிக்க, நமீபியாவால் 84 ரன்கள் மட்டுமே எடுக்க முடிந்தது. இதனால், 41 ரன்கள் வித்தியாசத்தில் வெற்றிபெற்று சூப்பர் 8 வாய்ப்பை பிரகாசப்படுத்திக் கொண்டது.

ஆனால், ஆஸ்திரேலியா – ஸ்காட்லாந்து போட்டியின் முடிவுக்காகக் காத்திருந்தது இங்கிலாந்து. அந்தப் போட்டியில் முதலில் பேட் செய்து 180 ரன்கள் என்கிற வலுவான ஸ்கோரை எட்டியது ஸ்காட்லாந்து. அத்தோடு, சேஸிங்கில் ஆஸ்திரேலியாவை முதல் பாதியில் மிரட்டவும் செய்தது. இங்கிலாந்து ரசிகர்கள் பதட்டத்தோடு இதைப் பார்த்துக் கொண்டிருந்த நிலையில், டிராவிஸ் ஹெட்- ஸ்டாய்னிஸ் ஜோடி இங்கிலாந்துக்கு நம்பிக்கை கொடுத்தது.

இந்த ஜோடியின் சிறப்பான ஆட்டத்தால் ஆஸ்திரேலிய அணி 5 விக்கெட்டுகள் வித்தியாசத்தில் வெற்றிபெறவே, இங்கிலாந்து அணி நிம்மதி பெருமூச்சு விட்டது. குரூப் பி-யைப் பொறுத்தவரை இங்கிலாந்து – ஸ்காட்லாந்து என இரண்டு அணிகளுமே 5 புள்ளிகளைப் பெற்றிருந்த நிலையில், ரன் ரேட் அடிப்படையில் இங்கிலாந்து அணி சூப்பர் 8 சுற்றுக்கு முன்னேறியது.