தமிழக வெற்றிக் கழகத்தின் தலைவர் விஜய் ஈரோடு பொதுக்கூட்டத்தில் ஆற்றிய உரைக்கு, அதிமுக தரப்பிலிருந்து முதல்முறையாக மிகக் கடுமையான எதிர்வினை வந்துள்ளது. அதிமுக முன்னாள் அமைச்சர் ஜெயக்குமார், விஜய்யின் பேச்சைக் கிண்டல் செய்ததோடு, அதிமுகவின் பலம் குறித்தும் ஆவேசமாகப் பேசியுள்ளார்.
முகமூடி போட்டால் எடுபடாது:
சென்னையில் செய்தியாளர்களைச் சந்தித்த ஜெயக்குமார், விஜய் தனது உரையில் எம்.ஜி.ஆர் மற்றும் ஜெயலலிதா ஆகியோரின் அரசியல் பாணியை மறைமுகமாகப் பின்பற்றுவது குறித்து விமர்சித்தார்.
“எம்.ஜி.ஆர், ஜெயலலிதா, அண்ணா என யாருடைய முகமூடியைப் போட்டுக்கொண்டு வந்தாலும் சரி, அதிமுகவின் கோட்டைக்குள் யாரும் நுழைய முடியாது. அதிமுகவிற்கு வாக்களித்த கைகள், அந்த விசுவாசமான கைகள் ஒருபோதும் வேறு யாருக்கும் வாக்களிக்காது. வரலாறு இதற்குச் சாட்சியாக இருக்கிறது” என அவர் கூறினார்.
ஊர்க்குருவி vs பருந்து:
விஜய்யின் அரசியல் வருகை மற்றும் அவரது பேச்சில் இருந்த ‘களம்’ குறித்த விமர்சனத்திற்குப் பதிலளித்த ஜெயக்குமார் ஒரு பழமொழியை மேற்கோள் காட்டினார். “ஊர்க்குருவி எவ்வளவு உயரமாகப் பறந்தாலும் அது பருந்தாக முடியாது. அதுபோல, புதிதாகக் கட்சி ஆரம்பித்தவர்கள் தங்களை ஒரு பெரிய சக்தியாக நினைத்துக்கொள்ளக் கூடாது” என்றார்.
ஆலமரத்தை அசைக்க முடியாது:
ஈரோடு கூட்டத்தில் “களத்தில் இல்லாதவர்களுடன் போட்டி இல்லை” என விஜய் பேசியது அதிமுகவைத்தான் எனப் பார்க்கப்படும் நிலையில், அதற்கு ஜெயக்குமார் அளித்த பதில்,
“அரசியலில் முளைத்து இன்னும் மூன்று இலை கூட விடாதவர்கள், தமிழக அரசியலில் பிரம்மாண்டமான ஆலமரமாக வேர்விட்டு நிற்கும் அதிமுகவைப் பற்றிப் பேச எந்தத் தகுதியும் இல்லை.”
நேரடிச் சவால்:
“களத்தில் யார் இருக்கிறார்கள் என்பது தேர்தலின் போது தெரியும். அதிமுகவை யாராலும் அசைக்க முடியாது” எனச் சவால் விடுத்தார். விஜய்யின் பேச்சுக்கு பாஜக, அதிமுக என இரு கட்சிகளும் ஒரே நேரத்தில் பதிலடி கொடுத்து வருவது, தமிழக அரசியல் களத்தில் விஜய்யின் வருகை ஏற்படுத்தியுள்ள அதிர்வலைகளை உறுதிப்படுத்துகிறது.