தமிழக அரசியல் களம் எப்போதும் எதிர்பாராத திருப்பங்களுக்கு பெயர் பெற்றது. அந்த வகையில், தமிழகத்தின் புதிய முதலமைச்சராக பதவியேற்றுள்ள விஜய், திராவிட சித்தாந்தத்தின் இதய பகுதியாக கருதப்படும் பெரியார் திடலுக்கு சென்று, திராவிடர் கழக தலைவர் கி. வீரமணி அவர்களை சந்தித்து ஆசி பெற்றுள்ளது, தமிழக அரசியலில் ஒரு மிகப்பெரிய ‘மாஸ்டர் ஸ்ட்ரோக்’ ஆக பார்க்கப்படுகிறது.
பல தசாப்தங்களாக திமுகவின் தார்மீக தூணாகவும், அக்கட்சியின் தேர்தல் வெற்றிகளுக்கு பின்னால் இருந்து சித்தாந்த பலம் சேர்த்தவருமான கி. வீரமணி, இன்று விஜய்யை வரவேற்று ஆசி வழங்கியுள்ளது திமுகவின் ‘அடிமடியில்’ கைவைக்கும் ஒரு செயலாகவே அரசியல் நோக்கர்களால் விமர்சிக்கப்படுகிறது.
திமுகவின் நீண்டகால கூட்டணிக் கட்சிகளாக இருந்த காங்கிரஸ், விடுதலை சிறுத்தைகள் கட்சி, இந்திய கம்யூனிஸ்ட் மற்றும் மார்க்சிஸ்ட் கம்யூனிஸ்ட் ஆகிய கட்சிகள் ஏற்கனவே விஜய்யின் தவெக-வுடன் கைகோர்த்து ஆட்சி அமைக்க ஆதரவு அளித்துவிட்டன. இந்த சூழலில், திராவிட இயக்கத்தின் தாய் அமைப்பான திராவிடர் கழகத்தின் ஆதரவும் மெல்ல மெல்ல விஜய்யின் பக்கம் சாய தொடங்கியிருப்பது, திமுகவை ஒரு தற்காப்பு நிலைக்கு தள்ளியுள்ளது. காலங்காலமாக திராவிட சித்தாந்தத்தின் ஏகபோக உரிமையாளராக தன்னை காட்டிக்கொண்ட திமுகவிற்கு, பெரியார் திடலிலேயே விஜய்க்கு கிடைத்துள்ள இந்த அங்கீகாரம் ஒரு மிகப்பெரிய தார்மீகப் பின்னடைவாகும்.
தற்போதைய நிலவரப்படி, திமுகவின் பக்கம் மதிமுக மற்றும் தேமுதிக போன்ற ஒரு சில கட்சிகளே எஞ்சியுள்ளன. ஆனால், தேர்தல் அரசியலில் பெரும் தாக்கத்தை ஏற்படுத்தக்கூடிய காங்கிரஸ், இடதுசாரிகள் மற்றும் விசிக போன்ற வாக்கு வங்கிகள் இப்போது விஜய்யின் பக்கம் அணிவகுத்து நிற்கின்றன. கடந்த 2026 சட்டமன்ற தேர்தலில் திமுகவின் தோல்விக்கு இந்த கூட்டணிக் கட்சிகளின் வெளியேற்றமே முக்கிய காரணமாக அமைந்தது. இப்போது சித்தாந்த ரீதியாகவும் கி. வீரமணி போன்றவர்களின் ஆசி விஜய்க்கு திரும்பியிருப்பது, திமுகவின் அரசியல் அடித்தளத்தையே அசைத்து பார்க்கும் ஒரு நிகழ்வாக மாறியுள்ளது.
விஜய்யின் இந்த அதிரடி நகர்வு, அவர் வெறும் சினிமா கவர்ச்சியை மட்டும் நம்பி அரசியலுக்கு வரவில்லை, மாறாக தமிழகத்தின் ஆழமான திராவிட அரசியல் வேர்களையும் மிகச்சரியாக கையாள தெரிந்திருக்கிறார் என்பதை காட்டுகிறது. பெரியார் திடலுக்குச் சென்று ஆசி பெற்றதன் மூலம், “நாங்களும் திராவிட சித்தாந்தத்தின் வாரிசுகள் தான்” என்ற செய்தியை அவர் மிக அழுத்தமாக பதிவு செய்துள்ளார். அதுமட்டுமின்றி இதில் பாஜகவுக்கும் மறைமுக செய்தி உள்ளது.
இறுதியாக, விஜய்யை வெறும் ஒரு நடிகராகப் பார்த்து எள்ளி நகையாடியவர்களுக்கு, அவரது இந்த அரசியல் ராஜதந்திரங்கள் ஆச்சரியத்தை அளித்துள்ளன. விஜய்யின் அரசியல் வளர்ச்சி என்பது வெறும் ஒரு மாயையல்ல, அது முறையான திட்டமிடலுடன் கூடிய ஒரு அதிகார பயணம் என்பதை இந்த பெரியார் திடல் சந்திப்பு உறுதிப்படுத்தியுள்ளது. “விஜய்யை நீங்கள் நோண்ட நோண்ட அவர் வளர்வார்” என்ற கூற்றுக்கிணங்க, ஒவ்வொரு விமர்சனத்தையும் ஒரு வாய்ப்பாக மாற்றி, திமுகவின் கோட்டையாக இருந்த இடங்களிலேயே தனது கொடியை விஜய் நட்டு வருகிறார். இனிவரும் காலங்களில் திமுகவின் அரசியல் இருப்பு என்பது ஒரு மிகப்பெரிய கேள்விக்குறியாகவே மாறியுள்ளது.