நடிகர் விஜய் தமிழகத்தின் நிரந்தர முதலமைச்சராக வருவார் என்று தவெக-வின் தற்போதைய தலைமை ஒருங்கிணைப்பாளர் செங்கோட்டையன் கூறியது, ஒரு சிறந்த நகைச்சுவை என்று செய்தித்துறை அமைச்சர் மு.பெ. சாமிநாதன் விமர்சித்துள்ளார்.
திருப்பூர் மாவட்டம் காங்கேயத்தில் செய்தியாளர்களைச் சந்தித்த அமைச்சர் மு.பெ. சாமிநாதன், செங்கோட்டையனின் சமீபத்திய அரசியல் மாற்றங்கள் மற்றும் அவரது உணர்ச்சிப்பூர்வமான பேச்சுகள் குறித்து நகைச்சுவையாகப் பேசினார்.
செல்லூர் ராஜுவை மிஞ்சிய செங்கோட்டையன்!
அதிமுகவில் நகைச்சுவையாகப் பேசுவதற்குப் பெயர்போனவர் செல்லூர் ராஜு என்று குறிப்பிட்ட அமைச்சர், தற்போது செங்கோட்டையன் அவரை விஞ்சிவிட்டதாகக் கூறினார். இது குறித்து அவர் பேசுகையில்,
“அதிமுகவின் முன்னாள் அமைச்சர் செங்கோட்டையன், தற்போது நடிகர் விஜய்யின் கட்சியில் இணைந்து கொண்டு, அவரை நிரந்தர முதலமைச்சர் ஆக்குவேன் என்று கூறியிருப்பது இந்த ஆண்டின் சிறந்த நகைச்சுவை. இதுவரை நகைச்சுவையான பேச்சுக்களுக்கு செல்லூர் ராஜு தான் பிரபலமாக இருந்தார். ஆனால், இப்போது விஜய்யைப் பற்றிப் பேசியதன் மூலம் செல்லூர் ராஜுவையே செங்கோட்டையன் பின்னுக்குத் தள்ளிவிட்டார்.”
அரசியல் முதிர்ச்சியற்ற பேச்சு?
அதிமுகவில் நீண்ட காலம் இருந்துவிட்டு, இப்போது தவெக-வில் இணைந்துள்ள செங்கோட்டையன், “விஜய் என் வழிகாட்டி,என் உடலில் ஓடும் ரத்தம் அவருக்குத்தான்” என்றெல்லாம் பேசுவது மக்களைத் திசைதிருப்பும் செயல் என அமைச்சர் சாமிநாதன் சாடினார். 9 முறை எம்.எல்.ஏ-வாக இருந்த ஒரு மூத்த அரசியல்வாதி, ஒரு திரை நட்சத்திரத்தின் பின்னால் சென்று இப்படிப் பேசுவதில் எந்த அரசியல் முதிர்ச்சியும் இல்லை என்றும் அவர் தெரிவித்தார்.
சமீபத்தில் செங்கோட்டையன் அதிமுகவில் இருந்து நீக்கப்பட்டு, தவெக-வில் இணைந்த பிறகு ஈரோடு மற்றும் காங்கேயம் பகுதிகளில் தொடர்ந்து விஜய்யை முன்னிறுத்திப் பேசி வருகிறார். இதற்கு திமுக தரப்பிலிருந்து வந்துள்ள இந்த நக்கல் கலந்த விமர்சனம் அரசியல் வட்டாரத்தில் பேசுபொருளாகியுள்ளது.