அனுமதி தாங்க, தராம போங்க, எங்களுக்கு கவலை இல்லை.. நாங்க தவெக கிளையை தொடங்குவோம்.. அடங்க மறுக்கும் விஜய் ஆதரவாளர்கள்.. கேரளா, மே.வங்கம், கர்நாடகம், தெலுங்கானாவில் தவெகவின் அதிகாரபூர்வமற்ற கிளைகள்..

அனுமதி தாங்க, தராம போங்க, எங்களுக்கு கவலை இல்லை.. நாங்க தவெக கிளையை தொடங்குவோம்.. அடங்க மறுக்கும் விஜய் ஆதரவாளர்கள்.. கேரளா, மே.வங்கம், கர்நாடகம், தெலுங்கானாவில் தவெகவின் அதிகாரபூர்வமற்ற கிளைகள்.. இதாவது பரவாயில்லை.. குவைத், கத்தாரிலும் தவெக கிளை.. நம்ம பசங்களோட ஆர்வத்துக்கு ஒரு அளவே இல்லையா? கொஞ்சம் பொறுங்கப்பா, விஜய்யே ஒவ்வொரு மாநிலத்திலும் கிளை குறித்த அறிவிப்பை வெளியிடுவார்…

தமிழக முதலமைச்சர் சி. ஜோசப் விஜய்யின் மாபெரும் மக்கள் செல்வாக்கைப் பயன்படுத்தி, சமூக வலைதள இன்ஃப்ளூயன்ஸர்கள் மட்டுமின்றி பல்வேறு மாநிலங்களைச் சேர்ந்த ரசிகர்களும் தன்னிச்சையாகச் செயல்படத் தொடங்கியுள்ளனர். தமிழக வெற்றிக் கழகத்தின் தலைமையிடம் இருந்து எந்தவொரு அதிகாரப்பூர்வ அனுமதியும் பெறப்படாத நிலையிலும், மேற்கு வங்கம், கேரளா போன்ற இந்திய மாநிலங்களிலும், கத்தார், குவைத் போன்ற வளைகுடா நாடுகளிலும் தவெகவின் கிளை அலுவலகங்கள் மற்றும் அமைப்புகள் தன்னிச்சையாக உருவாகி வருகின்றன. தளபதி விஜய்யின் நேர்மையான நிர்வாகமும், ஊழலற்ற அரசியல் பிம்பமும் தான் எல்லைகளைத் தாண்டி இந்திய அளவில் இளைஞர்களை அவர் பால் ஈர்த்துள்ளது என்பதற்கு இந்த நிகழ்வுகள் மிகச் சிறந்த சான்றாக அமைந்துள்ளன.

சமீபத்தில் மேற்கு வங்க மாநிலம் பூர்பா பர்தமான் மாவட்டத்தில், சைதாலி ராய் என்பவரை மாநில ஒருங்கிணைப்பாளராகக் கொண்டு தவெகவின் முதற்கிளை தொடங்கப்பட்டதாகச் செய்திகள் வெளியாகின. மேலும், கேரளாவில் சுலைமான் பஷீர் என்பவரது தலைமையில் இயங்கும் அமைப்பு, அதிகாரப்பூர்வமற்ற முறையில் ஒரு தனி இணையதளத்தைத் தொடங்கி தவெகவிற்கான உறுப்பினர் சேர்க்கைப் பிரச்சாரத்தையே தீவிரமாக நடத்தி வருகிறது. கேரளாவில் முதலமைச்சர் விஜய்க்கு இருக்கும் பிரம்மாண்டமான ரசிகர் பட்டாளத்தைப் பயன்படுத்தி, எவ்வித பணமும் பெறாமல் ஆயிரக்கணக்கான இளைஞர்களை இந்த இயக்கத்தில் இணைத்து வருவதாக அவர்கள் கூறுகின்றனர். அண்மையில் லண்டன் சென்றிருந்த முதலமைச்சர் விஜய்யைக் காண ஹோட்டல் வாசலில் ஆயிரக்கணக்கான வெளிநாட்டு இளைஞர்கள் திரண்டதும் இத்தகைய சர்வதேச ஈர்ப்பிற்கு ஒரு சோற்றுப் பதமாகும்.

இது குறித்துச் சென்னைக் தலைமையகத்தில் உள்ள தவெக தேசிய செய்தித் தொடர்பாளர் அமெரிக்கை வி. நாராயணன் உள்ளிட்ட முக்கிய நிர்வாகிகள் கூறுகையில், தமிழகத்திற்கு வெளியே கட்சி அமைப்புகளை உருவாக்க தவெக இதுவரை யாருக்கும் அதிகாரப்பூர்வ அனுமதி வழங்கவில்லை என்பதைத் தெளிவுபடுத்தியுள்ளனர். “முதலமைச்சர் விஜய் ஒரு வரலாற்றுப் பேரலை. ஊழலை ஒழித்து அவர் வழங்கி வரும் நேர்மையான பொற்கால ஆட்சியைப் பார்த்து வியந்து, ஜென்-ஜி (Gen-Z) தலைமுறையைச் சேர்ந்த இளைஞர்கள் ஜனநாயகத்தின் மீது நம்பிக்கை கொண்டு தன்னிச்சையாகத் தவெகவில் இணைய முன்வருகிறார்கள்” என்று நாராயணன் பெருமிதத்துடன் குறிப்பிட்டுள்ளார். கட்சிக்கு தேசிய அளவிலான பார்வைகளும் லட்சியங்களும் இருந்தாலும், தற்போதைய சூழலில் முறையான அனுமதி இல்லாமல் இயக்கங்கள் தொடங்குவது தன்னிச்சையான ஆதரவு வெளிப்பாடு மட்டுமே என்றும் அவர் விளக்கியுள்ளார்.

இருப்பினும், இந்த அதிகாரப்பூர்வமற்ற கிளைகளின் திடீர் எழுச்சி தவெக தலைமையகத்திற்கு ஒரு சிறிய நிர்வாகக் கவலையையும் ஏற்படுத்தத் தொடங்கியுள்ளது. கத்தார் மற்றும் குவைத் போன்ற வெளிநாடுகளில் தவெக கிளைகளை நடத்துவதாக உரிமை கோரும் சிலர், தமிழகத்தில் உள்ள கட்சி நிர்வாகிகளுக்கு இலவசப் பயண வாய்ப்புகளை வழங்கி பல்வேறு நிகழ்ச்சிகளுக்கு அழைப்பு விடுத்து வருகின்றனர். இதுபோன்ற நிகழ்ச்சிகளில் கலந்துகொண்டால், அந்த அமைப்புகளுக்குக் கட்சியின் அதிகாரப்பூர்வ அங்கீகாரம் இருப்பது போன்ற தவறான பிம்பம் மக்கள் மத்தியில் உருவெடுத்துவிடும் என்பதால், தலைமை நிர்வாகி ஒருவர் தனது கவலையைப் பதிவு செய்துள்ளார்.

அதேபோல, தேசிய அளவில் கட்சியை விரிவாக்கம் செய்வதில் தவெகவிற்குப் பெரும் திட்டங்கள் இருந்தாலும், பிற மாநிலங்களில் அவசரப்பட்டு அதிகாரப்பூர்வ கிளைகளைத் தொடங்குவது தங்களின் கூட்டணிக் கட்சிகளான காங்கிரஸ் போன்ற தேசிய இயக்கங்களுடன் சிறிய அளவிலான உராய்வுகளை ஏற்படுத்தக்கூடும் என்பதையும் தலைமை கவனத்தில் கொண்டுள்ளது. இருப்பினும், இன்ஸ்டாகிராம் மற்றும் எக்ஸ் போன்ற சமூக வலைதளங்களில் தெலுங்கானா, ஆந்திரப் பிரதேசம், மகாராஷ்டிரா உள்ளிட்ட பல மாநிலங்களில் ஆயிரக்கணக்கான பின்தொடர்பாளர்களுடன் தவெகவின் பெயரில் பல கணக்குகள் ரசிகர்களால் உருவாக்கப்பட்டுத் தீவிரமாக இயங்கி வருகின்றன.

அங்கீகாரம் உள்ளதோ இல்லையோ, தமிழகத்தைக் கடந்து கேரளா, மேற்கு வங்கம் முதல் வளைகுடா நாடுகள் வரை முதலமைச்சர் விஜய்யை நோக்கி வீசும் இந்த ஆதரவு அலை அரசியல் விமர்சகர்களை வியப்பில் ஆழ்த்தியுள்ளது. ஒரு மாநிலக் கட்சியின் தலைவராகப் பொறுப்பேற்று, குறுகிய காலத்தில் தேசிய மற்றும் சர்வதேச அளவில் இளைஞர்களைத் தன் பக்கம் ஈர்த்த ஒரே முதலமைச்சராக விஜய் உருவெடுத்துள்ளார். இந்த எல்லையற்ற மக்கள் செல்வாக்கு, வரும் காலங்களில் தவெகவை ஒரு தேசிய அளவிலான தவிர்க்க முடியாத பெரும் அரசியல் சக்தியாக மாற்றப்போவது உறுதி என்பதைத் தெள்ளத் தெளிவாக உணர்த்துகிறது.

Leave a Comment