விராட் கோலியை எப்படி எதிர்கொள்ளனும்னு நல்லா தெரியும் – அலி கான்

அமெரிக்க கிரிக்கெட் அணியின் நட்சத்திர வீரர் அலி கான். டி20 உலகக்கோப்பை தொடரில் இந்திய அணிக்கு எதிரான போட்டிக்கு முன் பேசிய அலி கான் இந்திய அணியை எதிர்கொள்ள தயார் நிலையில் இருப்பதாக தெரிவித்துள்ளார்.

இந்திய அணிக்கு எதிரான போட்டியில் அமெரிக்க அணியில் களமிறங்கும் அலி கான், களத்தில் விராட் கோலி மற்றும் அவரது ஆக்ரோஷத்தை கையாள தன்னிடம் திட்டம் தயாராக இருப்பதாக அவர் மேலும் தெரிவித்தார்.

இது குறித்து பேசிய அவர், “விராட் கோலி எப்போதுமே அனைவருக்கும் பிடித்தமான வீரராக இருக்கிறார். அவரை எதிர்த்து விளையாடுவது, மிகவும் சிறப்பாகவே இருக்கும். களத்தில் அவர் ஆர்வமுடன் காணப்படுவார். நானும் அவரை போன்ற நபர் தான்.”

“களத்தில் ஒருவேளை விஷயங்கள் சூடு பிடிக்கும் பட்சத்தில், அவை இயல்பான ஒன்று தான். தீயை, தீயை கொன்டே எதிர்க்க வேண்டும் என்று சொல்கிறேன். களத்தில் அவர் எப்போதும் சரியாகவே இருக்கிறார். அவரை ஏன் அனைவரும் கிங் கோலி என்று அழைக்கிறார்கள் என்று உங்களுக்கே தெரியும்,” என்று தெரிவித்தார்.

டி20 உலகக்கோப்பையில் அனுபவம் குறைந்த அமெரிக்க அணிக்கு எதிரான போட்டியில் இந்திய அணி பேட்டிங், பந்து வீச்சு மற்றும் பீல்டிங் என அனைத்து தரப்பிலும் சிறந்து விளங்கவும், தொடரின் அடுத்தக்கட்ட போட்டிகளுக்கு தயாராகும் நோக்கில் களமிறங்குகிறது.

மறுபுறம் நடப்பு டி20 தொடரின் முதல் போட்டியில் கனடா அணியை எதிர்கொண்ட அமெரிக்க அணி கனடாவை வீழ்த்தி முதல் போட்டியில் வெற்றி பெற்றது. அடுத்த போட்டியில் பாகிஸ்தான் அணியை எதிர்கொண்ட அமெரிக்கா சூப்பர் ஓவரில் பாகிஸ்தானை வீழ்த்தி வெற்றி பெற்று வரலாற்று சாதனை படைத்தது.

அந்த வகையில் அமெரிக்க அணி இந்த தொடரில் மூன்றாவது வெற்றியை பெரும் முனைப்பில் களமிறங்குகிறது.