தூத்துக்குடி, திருநெல்வேலி மாவட்டங்களில் 30 மணி நேரத்திற்கும் மேலாக நீடிக்கும் அடைமழை; புயல் நகர்ந்த பின்னரே மழை குறையும் – வானிலை ஆய்வு மையம் தகவல்.
தூத்துக்குடி, திருநெல்வேலி (நெல்லை) மாவட்டங்களில் கடந்த 30 மணி நேரத்திற்கும் மேலாக கனமழை இடைவிடாமல் வெளுத்து வாங்குகிறது. தெற்கு மாவட்டங்களில் நிலவும் வானிலைக் குறித்து வானிலை ஆய்வு மையம் வெளியிட்டுள்ள அறிக்கையில், ‘டிட்வா’ புயல் காரணமாகவே இந்தத் தொடர் அடைமழை பெய்து வருவதாகவும், புயல் நகர்வு காரணமாக அப்பகுதிகளில் கடும் குளிர் நிலவுவதாகவும் தெரிவிக்கப்பட்டுள்ளது.
கடந்த ஒரு நாளுக்கும் மேலாக நீடித்து வரும் இந்தத் தொடர் மழையின் காரணமாக தூத்துக்குடி மற்றும் திருநெல்வேலி நகரின் பல முக்கிய சாலைகள் வெள்ளத்தில் மூழ்கியுள்ளன. பல்வேறு குடியிருப்புப் பகுதிகளில் மழைநீர் தேங்கியுள்ளதால் மக்களின் இயல்பு வாழ்க்கை கடுமையாகப் பாதிக்கப்பட்டுள்ளது.
மழை குறைவது எப்போது என்பது குறித்து வானிலை ஆய்வு மையம் வெளியிட்டுள்ள தகவலில், “தற்போதைய நிலவரப்படி, புயல் வடக்கு நோக்கி நகர்ந்த பிறகுதான் மழையின் தீவிரம் படிப்படியாக குறையத் தொடங்கும். அதுவரை கடலோர மாவட்டங்கள் மற்றும் தாழ்வான பகுதிகளில் உள்ள மக்கள் எச்சரிக்கையுடன் இருக்க வேண்டும்” என்று அறிவுறுத்தப்பட்டுள்ளது.
மீனவர்கள் மறு அறிவிப்பு வரும் வரை கடலுக்குச் செல்ல வேண்டாம் என்றும், பொதுமக்கள் தேவையின்றி நீர்நிலைகள் அருகே செல்வதைத் தவிர்க்க வேண்டும் என்றும் மாவட்ட நிர்வாகம் சார்பில் எச்சரிக்கை விடுக்கப்பட்டுள்ளது.