தோல்வி என்னை நிலைகுலையச் செய்தது, ஒருகட்டத்தில் கிரிக்கெட்டை விட்டே விலகிவிடலாமா என்று கூட யோசித்தேன்” என இந்திய அணியின் கேப்டன் ரோஹித் சர்மா தனது ஓய்வு குறித்த வதந்திகளுக்கு இடையே உருக்கமாகப் பேசியுள்ளார்.
உலகக்கோப்பை இறுதிப்போட்டியில் ஏற்பட்ட தோல்விக்குப்பிறகு, ரோஹித் சர்மா நீண்ட நாட்களாகப் பொதுவெளியில் தோன்றாமல் இருந்தார். இந்நிலையில், அந்தத் தோல்வி தந்த வலி மற்றும் தனது எதிர்காலம் குறித்து அவர் முதல்முறையாக மனம் திறந்துள்ளார்.
எல்லாவற்றையும் இழந்துவிட்டதாக உணர்ந்தேன்:
தோல்வி குறித்துப் பேசிய ரோஹித், “ஒரு மிகப்பெரிய தோல்வியைத் தாங்குவது மிகவும் கடினம். அந்தப் போட்டி என்னிடமிருந்த எல்லாவற்றையும் எடுத்துக்கொண்டதாக உணர்ந்தேன். வாழ்க்கை அத்துடன் முடிந்துவிடுவதில்லை என்று எனக்குத் தெரியும், ஆனால் அது ஒரு பாடமாக அமைந்தது. மீண்டும் ஒரு புதிய தொடக்கத்தைப் பற்றி யோசிப்பது எனக்கு மிகவும் சவாலாக இருந்தது,” என்றார்.
“நிஜத்தைச் சொல்லப்போனால், இந்த விளையாட்டை விட்டே விலகிவிடலாமா என்று கூட ஒரு நிமிடம் நினைத்தேன். ஏனென்றால், அந்த ஒரு கனவிற்காக (உலகக்கோப்பை) நான் அத்தனை உழைப்பைக் கொடுத்திருந்தேன். ஆனால், இவ்வளவு காலம் கனவாகக் கண்ட ஒன்றை அவ்வளவு எளிதில் விட்டுவிட முடியாது என்று என் மனம் சொன்னது. அந்த இக்கட்டான சூழலில் இருந்து மீண்டு வர எனக்கு நிறைய நேரமும், மன சக்தியும் தேவைப்பட்டது,” என உருக்கத்துடன் தெரிவித்தார்.
மீண்டெழுவாரா ஹிட்மேன்?
ஓய்வு குறித்துப் பரவிய வதந்திகளுக்கு மத்தியில், ரோஹித் சர்மாவின் இந்தப் பேச்சு அவர் இன்னும் தனது கனவை நோக்கிப் பயணிக்கத் தயாராக இருப்பதையே காட்டுகிறது. “மீண்டு வருவது கடினம் தான், ஆனால் சாத்தியம்” என்ற அவரது வார்த்தைகள் கிரிக்கெட் ரசிகர்களிடையே நம்பிக்கையை ஏற்படுத்தியுள்ளது.
தற்போது தென் ஆப்பிரிக்கா தொடர் மற்றும் அடுத்தடுத்த ஐசிசி தொடர்களில் ரோஹித் சர்மா பங்கேற்பது குறித்து பிசிசிஐ (BCCI) ஆலோசித்து வரும் நிலையில், கேப்டனின் இந்த நேர்மையான பதிவு வைரலாகி வருகிறது.