தமிழக அரசியல் களம் தற்போது ஒரு மிகப்பெரிய மாற்றத்தை நோக்கி நகர்ந்து கொண்டிருப்பதை சென்னை மற்றும் அதன் சுற்றுவட்டார தொகுதிகளில் நிலவும் சூழல் உறுதிப்படுத்துகின்றன. குறிப்பாக சென்னை மற்றும் அதை சுற்றியுள்ள பகுதிகளில் நிலவும் அரசியல் காற்று, பாரம்பரிய திராவிட கட்சிகளுக்கு ஒருவித நெருக்கடியை ஏற்படுத்தியுள்ளது.
பெரம்பூர் தொகுதியில் தமிழக வெற்றி கழகத்தின் தலைவர் விஜய்யே நேரடியாக களமிறங்கியிருப்பது, அந்தத் தொகுதி மட்டுமல்லாது ஒட்டுமொத்த சென்னை மண்டலத்திலேயே ஒரு தாக்கத்தை உருவாக்கியுள்ளது. அமைச்சர்கள் மற்றும் செல்வாக்கு மிக்க தலைவர்கள் போட்டியிடும் தொகுதிகளில் தவெக வேட்பாளர்கள் வெளிச்சம் குறைவாக தெரிந்தாலும், ‘விஜய்’ என்ற ஒற்றை முகம் அந்த தொகுதிகளின் வெற்றி தோல்வியை தீர்மானிக்கும் காரணியாக உருவெடுத்திருப்பதை மறுக்க முடியாது.
சென்னையின் வாழ்வாதார பிரச்சினைகளான சட்டம் ஒழுங்கு, பெண்களின் பாதுகாப்பு மற்றும் போதைப்பொருள் கலாச்சாரம் போன்றவை இந்த தேர்தலில் மிக முக்கியமான விவாத பொருளாக மாறியுள்ளன. வழக்கமாக திராவிட கட்சிகள் தங்களின் வாக்கு வங்கியை தெருக்கள் வாரியாகத் துல்லியமாக கணக்கிட்டு வைத்திருப்பார்கள். ஆனால், இந்த முறை தவெக-வின் வருகையால் அந்த திட்டமிடல் அனைத்தும் சிதைந்து போயுள்ளன. “எந்த வீட்டில் இருந்து எத்தனை ஓட்டுகள் வரும்?” என்று அடித்துச் சொல்ல முடியாத அளவிற்கு ஒரு நிச்சயமற்ற தன்மை நிலவுகிறது. ஒவ்வொரு வீட்டிலும் தவெக-விற்கான ஒரு வாக்கு மௌனமாக உருவாகி இருப்பதை அரசியல் நோக்கர்கள் சுட்டிக்காட்டுகின்றனர். இது திமுக மற்றும் அதிமுக ஆகிய இரு துருவ அரசியலுக்கு இடையே ஒரு புதிய சக்தியின் எழுச்சியாக பார்க்கப்படுகிறது.
தவெக-வின் பலம் என்பது வெறும் மேடை பேச்சுகளில் மட்டும் இல்லாமல், வீடுகளுக்குள் நடக்கும் ‘சைலன்ட்’ பிரச்சாரத்தில் அடங்கியுள்ளது. குறிப்பாக இளைஞர்கள் தங்களின் குடும்ப உறுப்பினர்களிடம் மாற்றத்திற்காக ஒருமுறை வாய்ப்பு வழங்கும்படி வலியுறுத்தி வருகின்றனர். “நாங்கள் எப்போதுமே திமுக அல்லது அதிமுகவிற்குத்தான் வாக்களிப்போம், ஆனால் இந்த முறை எங்கள் பிள்ளைகள் புதுக்கட்சிக்கு ஒரு வாய்ப்பு தர சொல்கிறார்கள்” என்று பொதுமக்கள் வெளிப்படையாக பேச தொடங்கியுள்ளனர். விஜய் மக்கள் இயக்கம் என்ற வலுவான கட்டமைப்பு கடந்த பல ஆண்டுகளாக செய்து வந்த களப்பணிகள், இன்று தேர்தல் நேரத்தில் அவர்களுக்கு சாதகமான ஒரு உரையாடலை சாமான்ய மக்கள் மத்தியில் உருவாக்கியுள்ளது.
சென்னையை பொறுத்தவரை இது திமுகவின் அசைக்க முடியாத கோட்டையாக கருதப்பட்டாலும், இன்று அமைச்சர்களே தங்களின் சொந்த தொகுதிகளை விட்டு வெளியே சென்று மற்ற இடங்களுக்கு பிரச்சாரம் செய்ய முடியாத அளவிற்கு நெருக்கடிக்கு உள்ளாகியுள்ளனர். அதே நிலைதான் அதிமுகவிற்கும் நீடிக்கிறது. வெளி மாவட்ட தொகுதிகளிலும் கூட, தொடக்கத்தில் சாதாரணமாக கருதப்பட்ட வேட்பாளர்கள் மக்களிடம் செல்லும் விதம் மற்றும் அவர்களுக்கு கிடைக்கும் வரவேற்பு அமைச்சர்களுக்கு பெரும் தலைவலியை ஏற்படுத்தியுள்ளது. காசு கொடுத்து வாக்குகளை வாங்கலாம் என்ற எண்ணம் நிலவினாலும், மக்களின் மனமாற்றம் எத்தகைய பணபலத்தையும் மீறி செயல்படும் என்ற அச்சம் அரசியல் கட்சிகளிடையே பரவலாகக் காணப்படுகிறது.
இறுதியாக, சென்னை மற்றும் அதன் புறநகர் பகுதிகளில் நிலவும் இந்த Unpredictable சூழல், தமிழக அரசியலில் ஒரு புதிய வரலாற்றை படைக்கக்கூடும். நடுத்தர வர்க்க மக்கள் பெருமளவில் வாக்களிக்க முன்வருவதும், வாக்கு சதவீதம் அதிகரிப்பதும் தவெக போன்ற புதிய சக்திகளுக்கு சாதகமாக அமைய வாய்ப்புள்ளது. ஒரு ஸ்டார் வேல்யூ மற்றும் ரசிகர் பட்டாளத்தை தாண்டி, ஒரு மாற்றத்திற்கான தேவையை தவெக முன்னிறுத்துவது திராவிட கட்சிகளின் கட்டமைப்பிற்கு சவாலாக மாறியுள்ளது. மே 4-ம் தேதி தேர்தல் முடிவுகள் வெளியாகும்போது, தமிழகத்தின் இந்த அமைதியான அரசியல் புரட்சி எத்தகைய வெற்றியை தேடித்தரும் என்பது உலகிற்குத் தெரியவரும்.