தமிழக அரசியல் களம் 2026 சட்டமன்ற தேர்தலை நோக்கி அதிவேகமாக நகர்ந்து வரும் வேளையில், நடிகர் விஜய்யின் தமிழக வெற்றி கழக தொண்டர்கள் மற்றும் ரசிகர்கள் களத்தில் இறங்கி எடுத்துள்ள ஒரு விரிவான கருத்துக்கணிப்பு முடிவு தற்போது அரசியல் வட்டாரங்களில் பெரும் விவாதத்தை கிளப்பியுள்ளது.
இந்த சர்வே முடிவுகளின்படி, தமிழகத்தில் எந்த ஒரு கட்சிக்கும் தனிப்பெரும்பான்மை கிடைக்காத ஒரு “தொங்கு சட்டமன்ற” சூழல் உருவாக வாய்ப்புள்ளதாக தெரிகிறது. திமுக கூட்டணி 90 இடங்களையும், அதிமுக கூட்டணி 70 இடங்களையும் பிடிக்கும் வேளையில், முதல்முறையாக களம் காணும் விஜய்யின் தவெக சுமார் 60 இடங்களை கைப்பற்றி ஒரு பலமான “கிங் மேக்கர்” சக்தியாக உருவெடுக்கும் என்று இந்த அறிக்கை கூறுகிறது.
குறிப்பாக விஜய் போட்டியிடும் இரண்டு தொகுதிகளிலும் அவர் மிகப்பெரிய வாக்கு வித்தியாசத்தில் வெற்றி பெறுவார் என்பது உறுதி செய்யப்பட்டுள்ளது. இருப்பினும், இந்த சர்வேயில் பதிவாகியுள்ள மிக முக்கியமான அம்சம் என்னவென்றால், ஆட்சி அமைப்பதில் விஜய் யாருக்கு ஆதரவு அளிப்பார் என்பதுதான்.
இந்த கருத்துக்கணிப்பில் பங்கேற்ற பொதுமக்களில் பெரும்பாலோர், ஊழல் மற்றும் வாரிசு அரசியலுக்கு எதிராக பேசும் விஜய், மீண்டும் அதே பழைய திராவிட கட்சிகளுடன் கைகோர்ப்பதை விரும்பவில்லை என்று தெரிவித்துள்ளனர். அதிலும் குறிப்பாக, அதிமுகவுடன் சேர்ந்து கூட்டணி ஆட்சி அமைப்பதையோ அல்லது அவர்களுக்கு ஆதரவு அளிப்பதையோ மக்கள் முற்றிலுமாக தவிர்க்க வேண்டும் என்று அந்த சர்வே ரிப்போர்ட்டில் குறிப்பாக சுட்டிக்காட்டப்பட்டுள்ளது.
“மாற்றம் வேண்டும்” என்று கூறி அரசியலுக்கு வந்தவர், மீண்டும் ஒரு திராவிட கட்சியின் ஆட்சி அமைய காரணமாக இருந்தால், அது அவரது அரசியல் அடையாளத்தையே சிதைத்துவிடும் என்று நடுநிலை வாக்காளர்கள் கருதுகின்றனர். அதே சமயம், 60 இடங்களை வைத்து கொண்டு ஆட்சி அமைக்கவும் முடியாது, திமுக, அதிமுக எந்த காலத்திலும் இணைந்து ஆட்சி அமைக்காது என்பதால் மறுதேர்தலை தவிர வேறு வழியில்லை என்றே தெரிகிறது.
விஜய் தனது மாநாடுகளில் ஆக்ரோஷமாக பேசினாலும், தேர்தலுக்கு பிந்தைய சூழல் என்பது முற்றிலும் மாறுபட்டது. ஒருவேளை ஆட்சி அமைக்க தேவையான பெரும்பான்மை யாருக்கும் கிடைக்காத பட்சத்தில், தமிழகத்தில் குடியரசு தலைவர் ஆட்சி வருவதை தவிர்க்க விஜய் ஒரு முடிவை எடுக்க வேண்டியிருக்கும். ஆனால், மக்களின் விருப்பத்திற்கு மாறாக அதிமுக அல்லது திமுகவுடன் கைகோர்த்தால், அது 2029 மற்றும் அதற்கடுத்த தேர்தல்களில் தவெகவின் வளர்ச்சியைப் பாதிக்கும் என்று அவரது ஆலோசகர்கள் எச்சரிக்கின்றனர்.
ஆட்சி அதிகாரம் முக்கியமல்ல, மக்களின் நம்பிக்கையே முக்கியம்” என்ற நிலைப்பாட்டை எடுத்து விஜய் தனித்து இயங்குவாரா அல்லது தமிழகத்தின் அரசியல் ஸ்திரத்தன்மைக்காக ஒரு சமரச முடிவை எடுப்பாரா என்பதே தற்போதைய மில்லியன் டாலர் கேள்வியாக உள்ளது. இந்த சர்வே முடிவுகள் விஜய்யின் கைகளில் ஒரு மிகப்பெரிய பொறுப்பை ஒப்படைத்துள்ளன, அதை அவர் எப்படி கையாள போகிறார் என்பதை பொறுத்தே தவெகவின் எதிர்கால அரசியல் தீர்மானிக்கப்படும்.