தமிழக அரசியல் களத்தில் ஒரு புதிய கட்சியின் வருகை என்பது பல நேரங்களில் பல முனை போட்டிகளாக சிதறிவிடும். ஆனால், விஜய் தனது அரசியல் பயணத்தின் தொடக்கத்திலேயே காட்டிய மிக தெளிவான வியூகம், “இலக்கு ஒன்றுதான், அது ஆளுங்கட்சி தலைமைதான்” என்பதுதான். அரசியல் வியூக வல்லுனர்களின் கணிப்புப்படி, விஜய் செய்த மிக முக்கியமான புத்திசாலித்தனமான செயல், முதலமைச்சர் மு.க. ஸ்டாலினை மட்டுமே தனது பிரதான அரசியல் எதிரியாக முன்னிறுத்தி தாக்கியதுதான். உதயநிதி ஸ்டாலின், திமுக அமைச்சர்கள் அல்லது மாவட்ட செயலாளர்கள் என இரண்டாம் கட்ட தலைவர்கள் மீது தனது கவனத்தை சிதறவிடாமல், நேரடியாக ஆட்சி தலைமையின் மீது அம்புகளை எய்தது அவருக்கு ஒரு முதிர்ச்சியான பிம்பத்தை கொடுத்துள்ளது.
இந்த வியூகத்தின் பின்னணியில் ஒரு வலுவான தர்க்கம் உள்ளது. பொதுவாக ஒரு புதிய கட்சி தலைவர், அமைச்சர்களின் ஊழல்களையோ அல்லது உள்ளூர் நிர்வாகச் சீர்கேடுகளையோ பேச தொடங்கினால், அவர் ஒரு பிராந்திய தலைவராகவோ அல்லது சாதாரண அரசியல் விமர்சகராகவோ மட்டுமே பார்க்கப்படுவார். ஆனால், மோடி, அமித்ஷா அல்லது எடப்பாடி பழனிசாமி போன்ற அனுபவம் வாய்ந்த தலைவர்களே செய்ய தயங்கிய அல்லது செய்ய தவறிய ஒரு விஷயத்தை விஜய் துணிச்சலாக செய்துள்ளார். அதாவது, திமுகவின் ஒட்டுமொத்த அதிகார மையமான ஸ்டாலினை மட்டுமே குறிவைத்து தாக்குவதன் மூலம், “திமுகவிற்கு உண்மையான மாற்று நான்தான்” என்ற செய்தியை அவர் மக்களிடம் ஆழமாக பதிவு செய்துள்ளார். இது அவரை மற்ற எதிர்க்கட்சி தலைவர்களிடமிருந்து தனித்து காட்டுகிறது.
ஆட்சிக்கு எதிரான அதிருப்தி வாக்குகளை அள்ளுவதற்கு இதுவே மிக சிறந்த வழியாக கருதப்படுகிறது. ஒரு ஆட்சியில் அதிருப்தியில் இருக்கும் மக்கள், அந்த ஆட்சியின் குறைகளுக்கு யாரை காரணமாக பார்க்கிறார்களோ, அவரை துணிச்சலாக எதிர்க்கும் ஒருவருக்கே வாக்களிக்க விரும்புவார்கள். அமைச்சர்களையோ அல்லது மற்றவர்களையோ விஜய் கண்டுகொள்ளாமல் விட்டதன் மூலம், அவர் தனது நேரத்தையும் ஆற்றலையும் வீணடிக்கவில்லை. இதன் விளைவாக, திமுகவின் நிர்வாக தோல்விகள் அல்லது வாக்குறுதி மீறல்கள் என எதை மக்கள் குறையாக கருதினாலும், அந்த அதிருப்தி ஓட்டுகளைத் தன்பால் ஈர்க்கும் காந்தமாக விஜய் உருவெடுத்துள்ளார். இது மற்ற எதிர்க்கட்சிகளான அதிமுக அல்லது பாஜகவிற்கு செல்ல வேண்டிய வாக்குகளை திசைதிருப்பும் அபாயத்தை ஏற்படுத்தியுள்ளது.
அரசியல் களத்தில் “யாரை எதிர்க்கிறோம்” என்பதை மக்களிடம் தெளிவாக தெரிவிக்க வேண்டும். உதயநிதி ஸ்டாலின் போன்ற இளைய தலைமுறையினருடன் மோதி தனது நேரத்தை வீணாக்கி கொள்ளாமல், அதிமுகவினரை மற்றும் பலர் என ஒதுக்கி, சீமான் போன்றவர்களை லெப்ட் ஹேண்டில் டீல் செய்தது விஜய் ஒரு ‘வெயிட்’ ஆன அரசியல்வாதியாகத் தன்னை நிலைநிறுத்திக் கொண்டுள்ளார். இந்த அணுகுமுறை இளைஞர்கள் மத்தியிலும், நடுத்தர வர்க்கத்தினர் மத்தியிலும் அவர் மீதான மதிப்பை கூட்டியுள்ளது. மற்ற தலைவர்கள் பல முனைகளில் பேசி தங்களின் இலக்கை மாற்றிக் கொண்டே இருக்கும்போது, விஜய் ஒரு நேர்க்கோட்டில் தனது பயணத்தை தொடர்வது வியூக ரீதியான வெற்றி என்றே சொல்ல வேண்டும்.
இறுதியாக, இந்த ஒற்றை இலக்கு அரசியல் என்பது விஜய்க்கு ஒரு ‘கிங் மேக்கர்’ அல்லது ‘கிங்’ இடத்தை தேடித்தரும் என்றே நிபுணர்கள் கருதுகின்றனர். அமைச்சர்கள் மீதான தனிப்பட்ட விமர்சனங்கள் பெரும்பாலும் வசைபாடல்களாக முடிந்துவிடும், ஆனால் ஆட்சி தலைமை மீதான விமர்சனம் கொள்கை போராட்டமாக பார்க்கப்படும். அந்த பிம்பத்தை விஜய் மிக சரியாக கட்டமைத்துள்ளார். இதன் மூலம், வரும் தேர்தல் முடிவுகளில் திமுகவின் வாக்கு வங்கியில் ஒரு மிகப்பெரிய சரிவை ஏற்படுத்துவதோடு மட்டுமல்லாமல், அந்த சரிவை வெற்றியாக மாற்றும் வல்லமையும் விஜய்க்கு உண்டு என்பதுதான் தற்போதைய அரசியல் சூழலின் எதார்த்தம். இந்த மௌனப் புரட்சியும், வியூகமும் வாக்கு எண்ணிக்கையின் போது பல அதிரடி மாற்றங்களை உருவாக்கும் என்பது உறுதி.