10 மணிக்கு மேல ஆபீஸ்க்கு வர்றது பழைய காலம்… இனிமே காலைல 7 மணிக்கு முன்னாடி கமிஷனரே கிரவுண்ட்ல வந்து நிக்கனும்.. அதிகாரிங்க ஏசி ரூம்ல உக்காந்து ஃபைல் பார்க்குற காலம் முடிஞ்சு போச்சு, இப்ப எல்லாரும் மக்கள் மத்தியில களம் பார்க்கணும்… பயோ-மெட்ரிக்ல ஒரு டைம், நீங்க வர்றதுக்கு ஒரு டைமா? கார்டுல அட்டெண்டன்ஸ் விழுந்தா பத்தாது… ஸ்பாட்ல நீங்க இருக்கணும்! ஏமாத்த பார்த்தா அடுத்த செகண்டே சஸ்பெண்ட் ஆர்டர் வீட்டுக்கு வரும், ஜாக்கிரதை! சுகந்திப் சிங் பேடி பிறப்பித்த உத்தரவு.. இதுதான் மாற்றம்…!

தமிழக நகராட்சி நிர்வாகம் மற்றும் குடிநீர் வழங்கல் துறையின் மூலம், பொதுமக்களுக்கான சேவைகளை மிகவும் வெளிப்படையான முறையிலும் துரிதமாகவும் கொண்டு சேர்க்கும் நோக்கில் ஒரு புதிய அதிரடி உத்தரவு பிறப்பிக்கப்பட்டுள்ளது. தமிழக அரசின் கூடுதல் தலைமை செயலாளர் ககன்தீப் சிங் பேடி அவர்களால் வெளியிடப்பட்டுள்ள அரசாணை கடிதத்தில், நகர்ப்புற உள்ளாட்சி அமைப்புகள் பின்பற்ற வேண்டிய மிக முக்கியமான 16 வழிகாட்டு நெறிமுறைகள் மிகத் தெளிவாக விவரிக்கப்பட்டுள்ளன.

இந்த அதிகாரப்பூர்வ ஆவணத்தின்படி, நகராட்சி மற்றும் மாநகராட்சி ஆணையர்கள் அனைவரும் தினமும் காலை 7 மணிக்கு முன்பாகவே நேரடியாக களத்திற்கு சென்று தூய்மை பணிகளை ஆய்வு செய்ய வேண்டும் என்று கறாராக உத்தரவிடப்பட்டுள்ளது.

வயர்லெஸ் மற்றும் நவீன தொழில்நுட் வசதிகள் மூலம் திடக்கழிவு மேலாண்மை மற்றும் குப்பைகளை பிரித்தெடுக்கும் பணிகளை அவர்கள் கண்காணிக்க வேண்டும். அத்துடன், நகரின் முக்கியப் பொதுக் கழிப்பிடங்கள் மற்றும் பேருந்து நிலையங்களின் தூய்மை தன்மையை உயர் அதிகாரிகள் தினசரி நேரில் சென்று ஆய்வு செய்வது கட்டாயமாக்கப்பட்டுள்ளது.

மேலும், ஊழியர்களின் வருகை பதிவேட்டில் பயோ-மெட்ரிக் தரவுகளுக்கும் உண்மை நிலவரத்திற்கும் இடையே ஏதேனும் முறைகேடுகள் உள்ளனவா என்பதை அதிகாரிகள் குறுக்கு விசாரணை செய்து சரிபார்க்க வேண்டும்.

பொதுமக்களிடையே மக்கும் குப்பை மற்றும் மக்காத குப்பைகளை பிரித்து வழங்குவது குறித்த விழிப்புணர்வை ஏற்படுத்த, பேட்டரி மூலம் இயங்கும் அனைத்து கழிவு சேகரிப்பு வாகனங்களிலும் கட்டாயம் ‘தூய்மைப் பாடல்’ ஒலிக்கப்பட வேண்டும்.

சாலைகளில் தேங்கும் மணலை அகற்றும் பணிகளுக்கு தனி கவனம் செலுத்தப்பட வேண்டும். குறிப்பாக சாலைகளின் மையப்பகுதிகள் மற்றும் ஓரங்கள் மணல் இல்லாதவாறு தினமும் தூய்மை செய்யப்பட வேண்டும்.

அதுமட்டுமன்றி, பொதுச் சுவர்களில் ஒட்டப்பட்டுள்ள தேவையற்ற போஸ்டர்களை தினமும் அகற்றி, நகரங்களை போஸ்டர்கள் இல்லாதவாறு பராமரிக்க வேண்டும். சுகாதாரம் தொடர்பான வாராந்திர ஆய்வுக் கூட்டங்களை அடிமட்ட துப்புரவு ஆய்வாளர் மட்டம் வரை நடத்தி முந்தைய வார அறிக்கைகளை ஆய்வு செய்ய வேண்டும்.

திறந்தவெளி இருப்பு நிலங்கள் , நீர்நிலைகளைச் சுற்றியுள்ள பகுதிகள் மற்றும் சாலை ஓரங்களில் 5 அடிக்கு மேல் உயரமுள்ள மரக்கன்றுகளை நட்டு பசுமையைப் பராமரிக்க வேண்டும்.

போக்குவரத்துத் தீவுகள் மற்றும் சாலைத் தடுப்புகளில் குறைந்த தண்ணீரைப் பயன்படுத்தும் அழகுத் தாவரங்களை நட வேண்டும்.

பூங்காக்கள் மற்றும் அங்குள்ள குழந்தைகளின் விளையாட்டு உபகரணங்களின் தரத்தையும் அதிகாரிகள் ஆய்வு செய்ய வேண்டும்.

ஒவ்வொரு வாரமும் புதன்கிழமை மாலை வேளையில் தெருவிளக்குகளின் செயல்பாடுகளை ஆய்வு செய்து, எரியாத விளக்குகளை 24 மணி நேரத்திற்குள் மாற்றியமைக்க வேண்டும்.

குடிநீர் விநியோகம், சாக்கடைப் பிரச்சினைகள் மற்றும் சாலைப் பள்ளங்கள் தொடர்பான பொதுமக்களின் புகார்களுக்கு மிக உயர்ந்த முன்னுரிமை அளித்து அவற்றை உடனடியாகத் தீர்க்க வேண்டும்.

நகராட்சி வருவாய் வசூல் தொடர்பான வாராந்திரக் கூட்டங்களை நடத்தி, வரி செலுத்தத் தவறியவர்களின் பட்டியலைத் தனியாக ஆய்வு செய்ய உத்தரவிடப்பட்டுள்ளது.

கட்டிட வரைபட அனுமதிகளை எவ்விதக் காலதாமதமும் இன்றி முழுமையான வெளிப்படைத்தன்மையுடன் ஆன்லைன் மூலம் வழங்க வேண்டும். தேவையின்றி தாமதம் செய்யும் ஊழியர்கள் மீது கடுமையான ஒழுங்கு நடவடிக்கை பாயும்.

மருத்துவமனை உள்கட்டமைப்பை மேம்படுத்த திடீர் ஆய்வுகள் நடத்தப்பட வேண்டும். பள்ளிக் கட்டிடங்கள் மற்றும் நாடற்ற நாய் தொல்லைகளைக் கட்டுப்படுத்த கொண்டுவரப்பட்ட விலங்கு பிறப்பு கட்டுப்பாட்டு திட்டங்கள் மற்றும் ரேபிஸ் தடுப்பூசிப் பணிகள் ஆகியவை முறையாகத் தணிக்கை செய்யப்பட வேண்டும்.

பாதாளச் சாக்கடை திட்டங்கள் மற்றும் குடிநீர்த் திட்டப் பணிகளின் தரத்தை உறுதி செய்ய, பொறியாளர்கள் மற்றும் ஆணையர்கள் தினமும் வேலை நடக்கும் இடங்களை நேரில் பார்வையிட வேண்டும்.

சாலைகளின் தடிமன், சிமெண்ட் மற்றும் தார் ஆகியவற்றின் தரத்தை சோதனை செய்து மாதந்தோறும் ஆய்வுக் குறிப்புகளை கூடுதல் தலைமைச் செயலாளரின் பார்வைக்குச் சமர்ப்பிக்க வேண்டும்.

சுருக்கமாகக் கூறின், ககன்தீப் சிங் பேடி அவர்களின் இந்த அதிரடி 16 அம்ச வழிகாட்டுதல்கள் மூலம், தமிழகத்தின் நகர்ப்புற உள்ளாட்சி அமைப்புகள் மக்கள் நலனை நோக்கிய ஒரு புதிய மற்றும் தூய்மையான நிர்வாகப் புரட்சியை நோக்கி நகரத் தொடங்கியுள்ளன என்பது தற்போதைய கள நிலவரங்களின் மூலம் தெளிவாகப் புலனாகிறது.

Leave a Comment