இனிமேல் எந்த பெண்ணையாவது தரக்குறைவா பேசுவ? பேசுனா குண்டாஸ் தான்.. வாய் கூசாம குழந்தையின் பிறப்பையே சந்தேகப்படுற அளவுக்கு பொது வெளியில பேசுறீன்னா, பழைய ஆட்சி மாதிரி நம்மள ஒன்னும் செய்ய முடியாதுங்கிற திமிர் தானே.. அஞ்சு பைசா செலவில்லாம ஒரு யூடியூப் ஆரம்பிச்சு, நான் மீடியாக்காரன்னு சொல்லிகிட்டு பெண்களை அப்யூஸ் பண்ணின, ஜென்மத்துக்கும் களி தான்.. ஞாபகம் வச்சிக்கோ…

தமிழகத்தில் சமூக ஊடகங்கள் மற்றும் யூடியூப் சேனல்களின் வளர்ச்சி நேர்மறையான பல விஷயங்களை மக்களுக்குக் கொண்டு சேர்த்தாலும், சில நேரங்களில் அவை தனிநபர்களின் கண்ணியம் மற்றும் தனிமனித உரிமைகளைச் சீர்குலைக்கும் ஆயுதமாகவும் பயன்படுத்தப்பட்டு வருகின்றன. இத்தகைய சூழலில், யூடியூப் சேனலில் பெண் ஒருவரை மிகவும் இழிவுபடுத்தும் வகையிலும், அவதூறான கருத்துக்களைப் பரப்பிய வகையிலும் செயல்பட்ட திருச்சி சூர்யா மற்றும் யூடியூபர் முக்தார் அகமது ஆகிய இருவர் மீது சென்னை பெருநகர காவல் துறை கடுமையான நடவடிக்கையாக குண்டர் தடுப்பு காவல் சட்டத்தின் கீழ் நடவடிக்கை எடுத்து சிறையில் அடைத்துள்ளது. இந்த அதிரடி நடவடிக்கை சமூக வலைதளங்களில் வரம்பு மீறிச் செயல்படுவோருக்கு ஒரு பலத்த எச்சரிக்கையாக அமைந்துள்ளது.

வழக்கின் பின்னணி குறித்துப் பார்க்கையில், பாஜகவின் அலிஷா அப்துல்லா, சென்னை பெருநகர சென்னை காவல் ஆணையரிடம் ஒரு முக்கியப் புகாரை அளித்தார். அந்தப் புகாரில், ஒரு யூடியூப் சேனலில் வெளியிடப்பட்ட ஒரு காணொளியில், தன்னைப் பற்றியும், தனக்குப் புதிதாகப் பிறந்த இரட்டை குழந்தைகளைப் பற்றியும் மிகவும் ஆபாசமான, இழிவான மற்றும் பாலியல் ரீதியான அவதூறு கருத்துக்கள் தெரிவிக்கப்பட்டுள்ளதாகக் குறிப்பிட்டிருந்தார். பெண்ணின் கண்ணியத்தையும் தனிஉரிமையையும் மிகக் கொடூரமாகச் சிதைக்கும் வகையில் வெளியிடப்பட்ட இந்த வீடியோ குறித்து, சென்னை பெருநகர மத்திய குற்றப் பிரிவின் சைபர் குற்ற காவல் நிலையத்தின் சமூக ஊடக விசாரணைப் பிரிவு உடனடியாக வழக்குப்பதிவு செய்து விசாரணையைத் தொடங்கியது.

இந்தக் குற்றச்சாட்டுகளின் அடிப்படையில், முதற்கட்டமாகத் தீவிர விசாரணை நடத்திய சைபர் கிரைம் போலீஸார், வழக்கில் முதன்மைத் தொடர்புடையவரான திருச்சி சூர்யாவை கடந்த 04.06.2026 அன்று அதிரடியாகக் கைது செய்தனர். கைது செய்யப்பட்ட திருச்சி சூர்யா உடனடியாக நீதிமன்றக் காவலுக்கு உட்படுத்தப்பட்டு சிறையில் அடைக்கப்பட்டார். அரசியல் மற்றும் சமூக ஊடகப் பின்னணி கொண்ட நபர் ஒருவர் இத்தகைய இழிவான குற்றச்சாட்டில் கைது செய்யப்பட்டது பெரும் பரபரப்பை ஏற்படுத்திய நிலையில், இந்த வழக்கில் தொடர்புடைய மற்றொரு முக்கிய குற்றவாளியான முக்தாரைத் தேடும் பணியில் போலீஸார் தீவிரமாக இறங்கினர்.

போலீஸாரின் கைது நடவடிக்கைக்குப் பயந்து தலைமறைவாக இருந்த யூடியூபரான முக்தார் அகமது என்பவரைத் தனிப்படை போலீஸார் தீவிரமாகத் தேடி வந்தனர். இறுதியில், அவர் கர்நாடக மாநிலம், மாண்டியாவில் ஒளிந்திருப்பது கண்டுபிடிக்கப்பட்டு, கடந்த 09.06.2026 அன்று அங்கேயே வைத்து மடக்கிப் பிடிக்கப்பட்டார். மாண்டியாவில் கைது செய்யப்பட்ட முக்தார் உடனடியாகச் சென்னைக்கு அழைத்து வரப்பட்டு, தீவிர விசாரணைக்குப் பின்னர் நீதிமன்றக் காவலுக்கு உட்படுத்தப்பட்டார். முக்தார் மீது ஏற்கனவே 2 வழக்குகள் நிலுவையில் உள்ளதும், இதுபோன்ற அவதூறு பேச்சுக்களுக்காக அவர் மீது 20-க்கும் மேற்பட்ட புகார்கள் பெறப்பட்டு விசாரணை நடந்து வருவதும் குறிப்பிடத்தக்கது.

வழக்கில் கைதான எதிரிகள் இருவரும் தொடர்ந்து இதுபோன்ற குற்றச்செயல்களில் ஈடுபட்டு, சமூக அமைதியைக் கெடுக்கும் வகையிலும், பெண்களின் பாதுகாப்பிற்கு அச்சுறுத்தலாகவும் விளங்கி வந்தனர். இதனால், மத்திய குற்றப்பிரிவு சைபர் கிரைம் காவல் நிலைய ஆய்வாளரின் பரிந்துரையின் பேரில், சென்னை பெருநகர காவல் ஆணையாளர் முனைவர் A.அமல்ராஜ், இகாப அவர்கள் இன்று (16.06.2026) அதிரடி உத்தரவு ஒன்றைப் பிறப்பித்தார். அதன்படி, திருச்சி சூர்யா மற்றும் முக்தார் அகமது ஆகிய இருவரையும் குண்டர் தடுப்பு காவல் சட்டத்தின் ழ் சிறையில் அடைக்க உத்தரவிடப்பட்டு, அவர்கள் இருவரும் உடனடியாகக் குண்டாஸில் அடைக்கப்பட்டனர்.

சமூக ஊடகங்கள் என்ற போர்வையில் தனிநபர்களை, குறிப்பாகப் பெண்களைக் குறிவைத்து ஆபாசமாகவும் இழிவாகவும் பேசுபவர்கள் சட்டத்தின் பிடியில் இருந்து தப்ப முடியாது என்பதை இந்தச் சம்பவம் உணர்த்துகிறது. கருத்துச் சுதந்திரம் என்ற பெயரில் அடுத்தவர்களின் தனிப்பட்ட வாழ்க்கையையும் கண்ணியத்தையும் சிதைப்பவர்கள் மீது குண்டர் சட்டம் பாயும் என்ற சென்னை காவல்துறையின் இந்த அதிரடி நடவடிக்கை, இணையதள உலகில் தடம் மாறிப் பயணிக்கும் பலருக்கு ஒரு முற்றுப்புள்ளியாக அமையும் என்பதில் எவ்வித சந்தேகமும் இல்லை.

Leave a Comment