இந்தியாவின் அடுத்த கேப்டன் – மனம் திறந்த ஜெய் ஷா

இந்திய கிரிக்கெட் கட்டுப்பாட்டு வாரியம் பிசிசிஐ-இன் செயலாளர் ஜெய் ஷா டி20 உலகக் கோப்பையை வென்ற இந்திய அணிக்கு பாராட்டு தெரிவித்தார். கோப்பை வென்ற இந்திய அணியுடன் கடந்த சில நாட்களை கழித்த நிலையில், ஜெய் ஷா தற்போது வீடியோ வெளியிட்டு அணிக்கு தனது வாழ்த்துக்களை தெரிவித்துள்ளார்.

டி20 உலகக் கோப்பையை வென்றதை போன்றே அடுத்தடுத்து வரவிருக்கும் ஐசிசி தொடர்கள்- உலக டெஸ்ட் சாம்பியன்ஷிப் மற்றும் சாம்பியன்ஸ் டிராபி உள்ளிட்ட கோப்பைகளையும் இந்திய அணி ரோகித் சர்மா தலைமையில் வென்று குவிக்கும் என்று அவர் நம்பிக்கை தெரிவித்தார். அணிக்கு வாழ்த்து தெரிவித்ததோடு, வெற்றியை தலைமை பயிற்சியாளர் ராகுல் டிராவிட்-க்கு அர்ப்பணிப்பதாக தெரிவித்துள்ளார்.

இதோடு அணியின் தலைமை பயிற்சியாளர் பதவியில் இருந்து விலகும் ராகுல் டிராவிட், டி20 கிரிக்கெட்டில் இருந்து ஓய்வை அறிவித்து இருக்கும் ரோகித் சர்மா, விராட் கோலி மற்றும் ரவீந்திர ஜடேஜா ஆகியோருக்கு பாராட்டு தெரிவித்தார்.

இது குறித்து பிசிசிஐ செயலாளர் ஜெய் ஷா வெளியிட்ட வீடியோவில், “வரலாற்று வெற்றியை பெற்ற இந்திய அணிக்கு வாழ்த்துக்கள். இந்த வெற்றியை தலைமை பயிற்சியாளர் ராகுல் டிராவிட், கேப்டன் ரோகித் சர்மா, விராட் கோலி மற்றும் ரவீந்திர ஜடேஜா ஆகியோருக்கு அர்ப்பணிக்கிறேன். கடந்த ஓராண்டில் இது நமது மூன்றாவது இறுதிப் போட்டி ஆகும். கடந்த ஜூன் மாதம் உலக டெஸ்ட் சாம்பியன்ஷிப் தொடரில் நாம் தோல்வி அடைந்தோம்.”

“நவம்பர் 2023-இல் ஒருநாள் உலகக் கோப்பையையும் வெல்ல முடியாமல் போனது. ராஜ்கோட்டில் வைத்து ஜூன் 2024-இல் கோப்பை, அனைவரின் மனங்கள் மற்றும் உலகக் கோப்பை வென்று, இந்திய தேசிய கொடியை உயர பறக்க விடுவோம் என்று தெரிவித்து இருந்தேன். அதனை நமது கேப்டன் சரியாக செய்து முடித்தார். இறுதிப் போட்டியின் கடைசி 5 ஓவர்கள் இந்திய வெற்றிக்கு வழி வகுத்தது. இதற்கு சூர்யகுமார் யாதவ், பும்ரா, அர்ஷ்தீப் சிங் மற்றும் ஹர்திக் பாண்டியாவுக்கு மனமார்ந்த நன்றியை தெரிவித்துக் கொள்கிறேன்.

“இந்த வெற்றியை தொடர்ந்து 2025 உலக டெஸ்ட் சாம்பியன்ஷிப் மற்றும் சாம்பியன்ஸ் டிராபி தான் அடுத்தக்கட்டம். ரோகித் சர்மா தலைமையில் இந்த இரு தொடர்களிலும் நாம் வெற்றி பெறுவோம். அனைவருக்கும் நன்றி. ஜெய் ஹிந்த், வந்தே மாதரம்,” என்று தெரிவித்தார்.