விஜய் மீண்டும் நடிப்பார்.. இது உறுதி!.. 2026 தேர்தல் குறித்து நடிகை சிந்தியாவின் அதிரடி ஜோதிடக் கணிப்பு!

தமிழக அரசியல் களத்தில் தவெக தலைவர் விஜய்யின் வருகை பெரும் விவாதங்களை ஏற்படுத்தியுள்ள நிலையில், 2026 சட்டமன்றத் தேர்தலுக்குப் பிறகு விஜய் மீண்டும் நடிக்க வருவார் என நடிகை சிந்தியா லூர்டே தெரிவித்துள்ள கருத்து காட்டுத்தீயாகப் பரவி வருகிறது.

ஜோதிட சவால்:
தனது தயாரிப்பில் உருவாகியுள்ள ‘அனலி’ பட டிரைலர் வெளியீட்டு விழாவில் பேசிய நடிகை சிந்தியா, தனக்குச் சிறுவயது முதலே ஜாதகம் பார்க்கும் கலை தெரியும் என்று கூறினார். மேடையில் அவர் பேசியதாவது,

“2026-ல் தேர்தல் முடிகிறது. சரியாகச் சொல்லப்போனால், அந்த ஆண்டு நவம்பர் மாதம் விஜய் மீண்டும் சினிமாவில் நடிக்க வருவார். இது நடக்குதா இல்லையா என்று மட்டும் பாருங்கள். நான் ஜாதகம் கணிப்பதில் கில்லாடி, அந்த நம்பிக்கையில்தான் சொல்கிறேன்.”

சொந்தத் தயாரிப்பில் விஜய்?
விஜய் மீண்டும் நடிப்பது மட்டுமல்லாமல், தனது சொந்தத் தயாரிப்பு நிறுவனத்தின் (Cynthia Production House) கீழ் உருவாகும் படத்தில் அவர் நடிப்பார் என்றும், அவருடன் இணைந்து தான் நடிக்கப்போவதாகவும் சிந்தியா உறுதியாகத் தெரிவித்துள்ளார்.

விஜய் ஏற்கனவே ‘தளபதி 69’ தான் தனது கடைசிப் படம் என அறிவித்துவிட்டு முழுநேர அரசியலில் இறங்கியுள்ள சூழலில், நடிகை சிந்தியாவின் இந்தக் கணிப்பு சினிமா வட்டாரத்தில் பெரும் சலசலப்பை ஏற்படுத்தியுள்ளது.

விஜய் ரசிகர்கள் ரியாக்ஷன்:
சிந்தியாவின் இந்தப் பேச்சு சமூக வலைதளங்களில் வைரலாகி வருகிறது. தளபதி ரசிகர்கள் பலர், “தலைவர் அரசியலில் முதல்வர் ஆவாரா அல்லது மீண்டும் கேமரா முன் வருவாரா?” என விவாதித்து வருகின்றனர். அதேநேரம், தனது கணிப்பு நிச்சயம் பலிக்கும் எனச் சவால் விட்டுள்ள சிந்தியாவின் துணிச்சலைச் சிலர் பாராட்டியும், சிலர் விமர்சித்தும் வருகின்றனர்.

Leave a Comment