தமிழக அரசியலில் 2026 சட்டமன்ற தேர்தலுக்கான களம் இப்போதே சூடுபிடிக்க தொடங்கியுள்ளது. குறிப்பாக, அஇஅதிமுக பொதுச்செயலாளர் எடப்பாடி பழனிசாமி தலைமையிலான கூட்டணி குறித்த நகர்வுகள் அரசியல் வட்டாரத்தில் பெரும் விவாதத்தை ஏற்படுத்தியுள்ளன. அதிமுக இம்முறை 160 தொகுதிகளில் நேரடியாக போட்டியிட திட்டமிட்டுள்ளதாகவும், மீதமுள்ள 74 தொகுதிகளை மட்டுமே கூட்டணி கட்சிகளுக்கு ஒதுக்க தீர்மானித்துள்ளதாகவும் தகவல்கள் வெளியாகியுள்ளன. “நாங்கள் 160 இடங்களில் நிற்போம், மீதமுள்ள இடங்களை நீங்கள் பிரித்துக்கொள்ளுங்கள்” என்று அவர் கூட்டணி கட்சிகளிடம் கறாராக தெரிவித்ததும், தொகுதிகளை பிரித்து கொடுக்கும் பொறுப்பை பாஜகவிடம் அவர் விட்டுவிட்டதாக கூறப்படும் தகவல் பல சிறிய கட்சிகளிடையே சலசலப்பை உருவாக்கியுள்ளது.
எடப்பாடி பழனிசாமியின் இந்த அதிரடி முடிவுக்கு பின்னால் ஒரு தெளிவான அரசியல் கணக்கு இருப்பதாக கருதப்படுகிறது. கடந்த தேர்தல்களில் கூட்டணி கட்சிகளுக்கு அதிக இடங்களை ஒதுக்கி கொடுத்துவிட்டு, போதிய இடங்களை பிடிக்க முடியாமல் போன அனுபவத்தை அவர் கருத்தில் கொண்டுள்ளார். இம்முறை தனிப்பெரும் கட்சியாக உருவெடுத்து, ஆட்சியமைப்பதற்கான பெரும்பான்மையை தனது சொந்த கட்சி பலத்திலேயே நிரூபிக்க வேண்டும் என்பதில் அவர் உறுதியாக இருக்கிறார். இதனால், கூட்டணி கட்சிகளுக்குக் குறைவான இடங்களை ஒதுக்கி, அவர்களின் பலத்தை சோதிக்க அவர் துணிந்துவிட்டார் என்றே சொல்லலாம்.
இந்த சூழலில், பாஜகவுடனான கூட்டணி குறித்த கேள்விகள் மீண்டும் எழுந்துள்ளன. 160 தொகுதிகளை அதிமுக எடுத்துக்கொண்டால், மீதமுள்ள 74 இடங்களுக்குள் பாஜக, பாமக, அமமுக போன்ற கட்சிகள் எப்படித் தங்களை சரிக்கட்டிக் கொள்ளும் என்பது மிகப்பெரிய சவாலாகும். 74 இடங்களில் 40 தொகுதிகளை பாஜக தன்வசம் வைத்துக்கொண்டு மீதமுள்ள 34 தொகுதிகளை மற்ற கூட்டணிக் கட்சிகளான பாமக, அமமுக, புதிய தமிழகம் உள்ளிட்ட கட்சிகளுக்கு பிரித்து கொடுக்கும் ஒரு நிலை என்.டி.ஏ கூட்டணியில் ஏற்பட்டுள்ளது.
மறுபுறம், கூட்டணிக் கட்சிகளை எடப்பாடி பழனிசாமி கைவிட்டுவிட்டாரா என்ற விமர்சனங்களும் எழுகின்றன. ஆனால் தொகுதிகள் பிரித்து கொடுப்பதில் கருத்துவேறுபாடு ஏற்பட்டால், அது பிரச்சாரத்திலும் எதிரொலிக்கும் என்பதால் அந்த பொறுப்பை ஈபிஎஸ், அமித்ஷாவிடம் ஒப்படைத்ததும் ஒரு புத்திசாலித்தனமான நகர்வாக பார்க்கப்படுகிறது. தன்னிடம் பேரம் பேசுபவர்கள், அமித்ஷா கொடுத்ததை வாங்கி கொள்வார்கள் என்ற திட்டமே இதற்கு காரணம்.
ஒட்டுமொத்தமாகப் பார்க்கையில், 160 தொகுதிகள் என்ற எடப்பாடி பழனிசாமியின் இலக்கு, தமிழக அரசியலில் ஒரு மிகப்பெரிய மாற்றத்தை ஏற்படுத்தப்போகிறது. இது மற்ற கட்சிகளுடனான பேர வலிமையை குறைப்பதற்கான ஒரு தந்திரமா அல்லது உண்மையிலேயே அதிமுகவின் தனித்த பலத்தை நிரூபிப்பதற்கான முயற்சியாவென்பது தொகுதி பங்கீட்டு பேச்சுவார்த்தைகள் இறுதியாகும் போதுதான் தெரியவரும். எடப்பாடி பழனிசாமியின் இந்த அதிரடி வியூகம் அவருக்கு வெற்றியை தேடித்தருமா அல்லது கூட்டணி குழப்பத்தில் முடியுமா என்பதை பொறுத்திருந்துதான் பார்க்க வேண்டும்.