யோசேப்பு கதையும் ஓட்டை விழுந்த வரலாறும்.. விஜய் சொன்ன கதையில் மறைக்கப்பட்ட மறுபக்கம்! கொதிக்கும் சமூக வலைதளங்கள்..

தமிழக வெற்றிக் கழகத்தின் தலைவர் நடிகர் விஜய், சமீபத்தில் நடைபெற்ற ஒரு மதநல்லிணக்க நிகழ்வில் பைபிள் கதையான யோசேப்பின் வரலாற்றைக் கூறி தொண்டர்களிடையே உரையாற்றினார். ஆனால், அந்தக் கதையில் உள்ள ஒரு பகுதி மட்டுமே சொல்லப்பட்டிருப்பதாகவும், அதன் மறுபக்கம் மக்களுக்கு எதிரானது என்றும் தற்போது விமர்சனங்கள் எழுந்துள்ளன.

விஜய் சொன்ன கதை என்ன?:
யோசேப்பு தனது சகோதரர்களால் துரோகம் செய்யப்பட்டு எகிப்திற்கு அடிமையாக விற்கப்பட்டவர். ஆனால், தனது கடின உழைப்பாலும், கடவுளின் அருளாலும் அவர் எகிப்து நாட்டின் மிக உயரிய பதவிக்கு (அரசருக்கு அடுத்த நிலை) உயர்ந்தார். பஞ்சம் வந்த காலத்தில், தனக்கு துரோகம் செய்த சகோதரர்கள் உணவு தேடி வந்தபோது, அவர்களைப் பழிவாங்காமல் மன்னித்து, உணவளித்து அரவணைத்தார்.

இந்தக் கதையைச் சொல்லி முடித்த விஜய், “கடவுளின் அருளும், மக்களை நேசிக்கும் அன்பும், கடின உழைப்பும் இருந்தால் எவ்வளவு பெரிய எதிர்ப்புகளையும் வெல்லலாம்” என்று குறிப்பிட்டார். மேலும், “இந்தக் கதை யாருக்கானது என்று நான் சொல்லி உங்களுக்குத் தெரிய வேண்டிய அவசியமில்லை” என்று அவர் கூறியது, அரசியல் வட்டாரத்தில் அவர் யாரைச் சாடுகிறார் என்ற விவாதத்தை ஏற்படுத்தியது.

எழுந்துள்ள கடுமையான விமர்சனங்கள்:
விஜய் சொன்ன இந்தக் கதையில் யோசேப்பின் ‘மன்னிப்பு’ குணம் மட்டுமே பேசப்பட்டுள்ளது. ஆனால், அதே அதிகாரங்களில் (ஆதியாகமம் 47) யோசேப்பு கையாண்ட நிர்வாக முறைகள் தற்போது கேள்விக்குள்ளாக்கப்பட்டு வருகின்றன,

பஞ்சத்தைப் பயன்படுத்திய அதிகாரம்:
பஞ்சம் வந்தபோது எகிப்து மக்கள் உணவுக்காகத் தவித்தனர். அப்போது யோசேப்பு மக்களிடம் இருந்த பணம், கால்நடைகள் என அனைத்தையும் உணவுக்காகப் பெற்றுக் கொண்டார்.

நிலம் பறிப்பு மற்றும் அடிமைத்தனம்:
இறுதியில் மக்களிடம் எதுவுமில்லாத நிலையில், அவர்களின் நிலங்களையும் மன்னனுக்கு (பார்வோன்) எழுதி வாங்கிக் கொண்டு, ஒட்டுமொத்த எகிப்து மக்களையும் மன்னனின் அடிமைகளாக யோசேப்பு மாற்றினார் என்பது வரலாற்று விமர்சகர்களின் வாதம்.

நிர்வாக யுக்தியா? துரோகமா?:
பஞ்சம் முடிந்த பிறகு மக்கள் முறையாக வரி செலுத்தினாலே போதும் எனக் கூறியிருக்கலாம். அதை விடுத்து, மக்களின் வறுமையைப் பயன்படுத்தி ஒட்டுமொத்த தேசத்தையே மன்னனுக்குச் சொந்தமாக்கியது ஒரு ‘மக்கள் நலன்’ சார்ந்த தலைவருக்கு அழகல்ல என்று நெட்டிசன்கள் கருத்துத் தெரிவித்து வருகின்றனர்.

விஜய்க்கு முன்வைக்கப்படும் கேள்விகள்:
சமூக வலைதளங்களில் இந்தப் பதிவு வைரலாகி வரும் நிலையில், “விஜய் முழுக் கதையையும் படிக்காமல் பேசிவிட்டாரா?” அல்லது “அரசனாகும் ஆசையில் இப்படிப்பட்ட ஒரு உதாரணத்தைத் தேர்ந்தெடுத்தாரா?” என்ற கேள்விகள் எழுப்பப்படுகின்றன.

விஜய் தனது உரையில் ‘மக்களை நேசிக்கும் அன்பு’ பற்றிப் பேசினாலும், அவர் குறிப்பிட்ட யோசேப்பின் வரலாறு ‘மக்களை அடிமையாக்கிய’ ஒரு சூழலையும் உள்ளடக்கியதுதான் என்பதே இந்த விவாதத்தின் மையப்பொருள்.

Leave a Comment