வச்சாரு பாரு ஆப்பு.. அனைத்து அரசு ஊழியர்களும் சொத்துக்கணக்கை ஆன்லைனில் காட்ட வேண்டும்.. கணக்கு காட்டாதவர்களுக்கு புரமோஷன் கிடையாது.. வருமானத்திற்கு அதிகமான ஒவ்வொரு சொத்தும் எப்படி வந்தது என விசாரிக்க ஆரம்பித்தால் பல பேர் சஸ்பெண்ட், டிஸ்மிஸ் ஆகலாம்.. முதலமைச்சர் விஜய் ஆட்சியில் அரசியல்வாதிகள் மட்டுமல்ல, அரசு அதிகாரிகளும் தப்பிக்க முடியாது போல.. லஞ்சம், ஊழல் இல்லாத அதிகாரியாக திருந்துங்கள் அல்லது திருத்தப்படுவீர்கள் என்பது தான் தவெக ஆட்சியின் தாரக மந்திரம்..
தமிழ்நாட்டில் உள்ள அனைத்து அரசு ஊழியர்களும், அகில இந்திய பணி அதிகாரிகளைத் தவிர, தங்களது அசையும் மற்றும் அசையா சொத்துக்கள் குறித்த ஆண்டு விவரங்களை ஆன்லைன் மூலமாக கட்டாயம் சமர்ப்பிக்க வேண்டும் என்று தமிழக அரசு புதிய உத்தரவை பிறப்பித்துள்ளது.
IFHRMS தளம் வாயிலாக இந்த சொத்து விவர பிரகடனத்தை சமர்ப்பிப்பது கட்டாயமாக்கப்பட்டுள்ளது. அதன்படி, வங்கிக் கணக்கு சேமிப்புகள், வாகனங்கள், தங்க நகைகள், கடன்கள் மற்றும் பிற பொறுப்புகள் போன்ற அனைத்து விவரங்களையும் ஊழியர்கள் வெளிப்படையாக தெரிவிக்க வேண்டும். கடந்த 2026-ஆம் ஆண்டு டிசம்பர் 31-ஆம் தேதி வரையிலான சொத்து விவரங்களை நடப்பாண்டு அக்டோபர் 31-ஆம் தேதிக்குள் சமர்ப்பிக்க வேண்டும் என்றும் காலக்கெடு நிர்ணயிக்கப்பட்டுள்ளது.
இந்த நடைமுறை முறைப்படுத்தப்படுவதன் மூலம் அரசு நிர்வாகத்தில் வெளிப்படைத்தன்மை அதிகரிக்கும் என்று பரவலாக வரவேற்கப்பட்டாலும், இதற்கான உண்மையான வெற்றி என்பது சொத்து விவரங்களை சமர்ப்பித்த பிறகு மேற்கொள்ளப்படும் நடவடிக்கைகளில்தான் அடங்கியுள்ளது. வெறும் கணக்கைத் தாக்கல் செய்வதோடு நின்றுவிடாமல், முறையான சரிபார்ப்புப் பணிகளை மேற்கொள்வதும், தாக்கல் செய்யப்பட்ட விவரங்களை முறைப்படி ஆய்வு செய்வதும் மிகவும் அவசியமாகும். குறிப்பாக, கணக்கில் காட்டப்படாத சொத்துக்கள் அல்லது முறையற்ற வழிகளில் சேர்க்கப்பட்ட செல்வங்கள் குறித்துத் தீவிர விசாரணை நடத்தி உரிய நடவடிக்கை எடுத்தால் மட்டுமே இந்தத் திட்டத்தின் உண்மையான நோக்கம் முழுமை பெறும்.
சொத்து விவரங்களைச் சமர்ப்பிக்கத் தவறுவது அரசுப் பணி ஒழுக்க விதிகளின் கீழ் கடுமையான மீறலாகக் கருதப்படும் என்று அரசு திட்டவட்டமாக எச்சரித்துள்ளது. மேலும், சொத்துக் கணக்கைத் தாக்கல் செய்த நிலை அந்தந்த ஊழியர்களின் ஆண்டு மதிப்பீட்டு அறிக்கையிலும் பதிவு செய்யப்படும். அதுமட்டுமின்றி, ஊழியர்களுக்கான பதவி உயர்வுகள் பரிசீலிக்கப்படும்போதும் இந்தச் சொத்துப் பிரகடன விவரங்கள் முக்கியமாக கவனத்தில் கொள்ளப்படும். சரியான நேரத்தில் விவரங்களைச் சமர்ப்பிக்காதவர்கள் மற்றும் விதிக மீறலில் ஈடுபடுபவர்கள் எதிர்காலத்தில் பதவி உயர்வு உள்ளிட்ட சலுகைகளைப் பெறுவதில் தடைகளைச் சந்திக்க நேரிடும்.
அரசு நிர்வாகத்தில் நிலவும் ஊழலைக் கட்டுப்படுத்தவும், நிர்வாக வெளிப்படைத்தன்மையை மேம்படுத்தவும் இந்த நடவடிக்கை ஒரு மிக முக்கியமான படியாகப் பார்க்கப்படுகிறது. ஏற்கெனவே தவெக அரசு லஞ்சக் கோரிக்கைகளைப் பொதுமக்கள் எளிதில் புகார் அளிப்பதற்காக வாட்ஸ்அப் சேவையை அறிமுகப்படுத்தியுள்ளது குறிப்பிடத்தக்கது. இந்த வாட்ஸ்அப் புகார் தளமும், தற்போது கட்டாயமாக்கப்பட்டுள்ள ஆன்லைன் சொத்துப் பிரகடனமும் இணைந்து செயல்படும் பட்சத்தில், லஞ்ச ஒழிப்பு நடவடிக்கைகளில் ஒரு பெரிய மாற்றத்தை ஏற்படுத்த முடியும். பொதுமக்கள் மற்றும் அரசுத் தரப்பில் இருந்து ஒரே நேரத்தில் அழுத்தம் கொடுக்கப்படும்போது, ஊழல் பேர்வழிகள் எளிதில் தப்பிக்க முடியாது.
எந்தவொரு சீர்திருத்தக் கொள்கையும் அறிவிப்போடு நின்றுவிடாமல், அதன் தொடர்ச்சியான கண்காணிப்பு மூலமே பலனளிக்கத் தொடங்கும். சொத்து விவரங்களை ஆன்லைனில் அறிவிப்பது என்பது வெளிப்படைத்தன்மையை நோக்கிய ஒரு முதல் படியாக மட்டுமே இருக்க முடியும். ஆனால், உண்மையான மாற்றம் வேண்டுமானால், அந்த விவரங்கள் மீது கடுமையான தணிக்கையும், தவறு செய்வோர் மீது பாரபட்சமின்றி கடுமையான நடவடிக்கையும் எடுக்கப்பட வேண்டும். அப்போதுதான் அரசுத் துறைகளில் நேர்மையான சூழல் உருவாகி, பொதுமக்களின் அசைக்க முடியாத நம்பிக்கையைப் பெற முடியும்.