“திமுக கூட்டணியில் விரிசல் தொடங்கிவிட்டது, எந்த நேரத்திலும் காங்கிரஸ் அங்கிருந்து கழன்றுவிடும்” – மேட்டூர் அருகே நடைபெற்ற பிரம்மாண்ட பொங்கல் விழாவில் அதிமுக பொதுச்செயலாளர் எடப்பாடி பழனிசாமி ஆற்றிய பேச்சு தமிழக அரசியலில் பெரும் புயலைக் கிளப்பியுள்ளது.
விவசாயிகளுடன் பொங்கல் கொண்டாட்டம்:
சேலம் மாவட்டம் மேச்சேரி அருகே உள்ள காளிப்பட்டி பகுதியில் அதிமுக சார்பில் இன்று ‘விவசாயிகளுடன் பொங்கல்’ விழா நடைபெற்றது. 108 பானைகளில் பொங்கல் வைத்து, மாட்டு வண்டியில் ஊர்வலமாக வந்து எடப்பாடி பழனிசாமி இந்த விழாவைத் தொடங்கி வைத்தார். பின்னர் தொண்டர்களிடையே உரையாற்றிய அவர், வரவிருக்கும் 2026 தேர்தல் குறித்துப் பல அதிரடி தகவல்களை வெளியிட்டார்.
வெளியேறும் காங்கிரஸ்:
திமுக-காங்கிரஸ் இடையிலான உறவு குறித்து அவர் பேசியதாவது, “திமுக கூட்டணியில் இப்போது எல்லாம் சரியாக இல்லை. காங்கிரஸ் கட்சி பெரும் அதிருப்தியில் இருக்கிறது. அவர்கள் எந்த நேரத்திலும் திமுக கூட்டணியை விட்டு வெளியேறலாம். அதற்கான அறிகுறிகள் இப்போதே தெரியத் தொடங்கிவிட்டன.”
“அதிமுக தலைமையிலான தேசிய ஜனநாயகக் கூட்டணியில் (NDA) இணைய இன்னும் சில முக்கியக் கட்சிகள் தயாராக உள்ளன. விரைவில் பலமான கூட்டணி அமையும். 2026 சட்டமன்றத் தேர்தலுடன் திமுகவின் சர்வாதிகார ஆட்சி முடிவுக்கு வரும். மக்கள் அதிமுக பக்கம் திரும்பத் தொடங்கிவிட்டனர்.”
மாணிக்கம் தாகூருக்கு ‘நோஸ் கட்’:
டெல்லி பொங்கல் விழாவில் பங்கேற்ற தமிழ் கலைஞர்களை “சங்கிக் குழு” என விமர்சித்த காங்கிரஸ் எம்.பி. மாணிக்கம் தாகூருக்குப் பதிலடி கொடுத்த எடப்பாடி, “தமிழ்ப் பண்பாட்டைக் கொண்டாடுவதைக் கூட அரசியலாக்கும் நிலையில் காங்கிரஸ் இருக்கிறது. இவர்களுடனான திமுக-வின் உறவு நீடிக்காது,” எனச் சுட்டிக்காட்டினார்.
பரபரக்கும் அரசியல் களம்!
அதிமுக-பாஜக கூட்டணி ஏற்கனவே உறுதியாகிவிட்ட நிலையில், தற்போது பாமக-வின் அன்புமனி தரப்பும் அதிமுக பக்கம் சாய்ந்துள்ளதாகத் தகவல்கள் வருகின்றன. இந்தச் சூழலில், “காங்கிரஸ் வெளியேறும்” என எடப்பாடி பழனிசாமி பேசியிருப்பது, திமுக தலைமைக்கு ஒரு எச்சரிக்கை மணியாகவே பார்க்கப்படுகிறது.
எடப்பாடியின் இந்தக் கணிப்பு பலிக்குமா? 2026-ல் காங்கிரஸ் அதிமுக பக்கம் வருமா? அல்லது புதிய கூட்டணி உருவாகுமா? என்பதுதான் இப்போதைய ஹாட் டாபிக்!