தமிழக பாஜகவில் தற்போது நிலவி வரும் உட்கட்சி பூசல்கள் மற்றும் தேர்தல் வியூகங்கள் தொண்டர்கள் மத்தியில் பெரும் அதிர்ச்சியையும், குழப்பத்தையும் ஏற்படுத்தியுள்ளது. குறிப்பாக, கோவை வடக்கு தொகுதியில் போட்டியிடும் வானதி சீனிவாசன் மற்றும் திமுகவின் முக்கிய புள்ளியான செந்தில் பாலாஜி ஆகியோருக்கு இடையே மறைமுக ஒப்பந்தம் நிலவுவதாக எழுந்துள்ள புகார்கள் சமூக வலைதளங்களில் தீயாக பரவி வருகின்றன. செந்தில் பாலாஜி சொல்லி தான் வானது கோவை வடக்கு தொகுதிக்கு மாறிவிட்டதாகவும், செந்தில் பாலாஜி கோவை தெற்கு தொகுதியில் போட்டியிடுவதாகவும் ஒரு வதந்தி பரவி வருகிறது.
ஒருபுறம் திமுகவை அண்ணாமலை கடுமையாக எதிர்த்து வரும் வேளையில், கட்சியின் மூத்த தலைவர்கள் தங்களின் வெற்றிப்பாதையை உறுதி செய்ய திமுகவுடன் ரகசிய பேச்சுவார்த்தையில் ஈடுபடுவது அண்ணாமலையின் தீவிர ஆதரவாளர்களை கடும் கோபத்திற்கு உள்ளாக்கியுள்ளது.
மயிலாப்பூர் தொகுதியில் களம் காணும் தமிழிசை சௌந்தரராஜன் மீதும் இதே போன்ற விமர்சனங்கள் முன்வைக்கப்படுகின்றன. அவர் அதிமுக பொதுச்செயலாளர் எடப்பாடி பழனிசாமியுடன் ஒரு மறைமுக ஒப்பந்தத்தில் ஈடுபட்டுள்ளதாக கூறப்படுகிறது. அதிமுகவின் வாக்கு வங்கியை தன்பக்கம் இழுப்பதற்காக கொள்கைகளை விட்டு கொடுத்து அவர் செயல்படுகிறாரா என்ற கேள்வி எழுந்துள்ளது. “என்னடா நடக்குது தமிழக பாஜகவில்?” என்று ஆதங்கப்படும் தொண்டர்கள், கட்சியின் அடிப்படை சித்தாந்தத்திற்கு விரோதமாக மூத்த தலைவர்கள் செயல்படுவது தாமரை மலர்வதற்கு தடையாக அமையும் என்று எச்சரிக்கின்றனர். தனிப்பட்ட வெற்றியை காட்டிலும் கட்சியின் கௌரவமே முக்கியம் என்பதை இவர்கள் மறந்துவிட்டதாக குற்றச்சாட்டுகள் எழுகின்றன.
அண்ணாமலை மாநிலத் தலைவரான பிறகு பாஜகவிற்கும் திராவிட கட்சிகளுக்கும் இடையே ஒரு தெளிவான இடைவெளி உருவானது. ஆனால், தற்போது எல். முருகன் மற்றும் நயினார் நாகேந்திரன் ஆகிய இருவரும் எடப்பாடி பழனிசாமியுடன் மிக நெருக்கமாக செயல்படுவது போன்ற தோற்றம் உருவாகியுள்ளது. இவர்கள் இருவரையும் எடப்பாடி பழனிசாமி தரப்பு “வெயிட்டாக” கவனித்ததா என்ற சந்தேகம் தொண்டர்கள் மத்தியில் எழுந்துள்ளது. இல்லாவிட்டால் இவ்வளவு குறைந்த தொகுதிக்கும், வெற்றி பெறாத முடியாத தொகுதிக்கும் பாஜக எப்படி ஒப்புக்கொண்டது என்ற சந்தேகமும் எழுகின்றன.
தமிழக பாஜகவின் வளர்ச்சி என்பது அண்ணாமலையின் நேரடி அரசியல் மற்றும் ஆக்ரோஷமான போராட்டங்களால் உருவானது. ஆனால், மூத்த தலைவர்கள் பழைய பாணி அரசியலை கையில் எடுத்து, திராவிட கட்சிகளுடன் நேரடியாகவும், மறைமுகமாகவும் சமரசம் செய்துகொள்வது அண்ணாமலையின் உழைப்பை வீணடிக்கும் செயலாகவே பார்க்கப்படுகிறது. “தலைவர் அண்ணாமலை ஊழலுக்கு எதிராக போராடும் போது, இவர்கள் அதே ஊழல் புகாரில் சிக்கியவர்களுடன் கைகோர்ப்பது எப்படி நியாயம்?” என்று தொண்டர்கள் குமுறுகின்றனர். இந்த ரகசிய ஒப்பந்தங்கள் உண்மையாக இருக்கும் பட்சத்தில், அது நேர்மையான அரசியலை விரும்பும் இளைஞர்களை கட்சியிலிருந்து அந்நியப்படுத்திவிடும்.
இறுதியாக, தமிழக பாஜகவில் ஏற்பட்டுள்ள இந்த விரிசல் தேர்தலுக்கு பிந்தைய விளைவுகளை இப்போதே காட்ட தொடங்கியுள்ளது. அண்ணாமலை ஒரு பாதையிலும், மூத்த தலைவர்கள் மற்றொரு பாதையிலும் பயணிப்பது கட்சிக்குள் பெரும் குழப்பத்தை ஏற்படுத்தியுள்ளது. டெல்லி தலைமை இந்த விவகாரத்தில் தலையிட்டு, “கருப்பு ஆடுகளை” இனம் கண்டு நடவடிக்கை எடுக்க வேண்டும் என்பதே தொண்டர்களின் ஒரே கோரிக்கையாக உள்ளது. 2026 தேர்தல் என்பது வெறும் வெற்றி தோல்விக்கான களம் மட்டுமல்ல, அது அண்ணாமலையின் கொள்கை ரீதியான அரசியலுக்கும், மூத்த தலைவர்களின் சமரச அரசியலுக்கும் இடையிலான ஒரு பெரும் பரீட்சையாக அமையப்போகிறது. எடப்பாடி மற்றும் செந்தில் பாலாஜி போன்றவர்களுடன் கைகோர்ப்பது பாஜகவின் எதிர்காலத்தை சூனியமாக்கிவிடும் என்பதே நிதர்சனம்.