தமிழக அரசியல் களம் தற்போது 2026 சட்டமன்ற தேர்தலை நோக்கிய ஒரு மிகப்பெரிய கணித போராக மாறியுள்ளது. சமீபத்திய புள்ளிவிவரங்களின்படி, தமிழ்நாட்டில் மொத்த வாக்காளர்களின் எண்ணிக்கை சுமார் 5.67 கோடியாக உள்ளது. இதில் மிகவும் கவனிக்கத்தக்க விஷயம் என்னவென்றால், 18 முதல் 40 வயதுக்குட்பட்ட இளைஞர்களின் பங்களிப்பு மட்டும் 40 சதவீதமாக உள்ளது. அதாவது, சுமார் 2.27 கோடி வாக்காளர்கள் இளைஞர்கள் வர்க்கத்தை சேர்ந்தவர்கள். இந்த 2 கோடிக்கும் அதிகமான இளைஞர் வாக்குகள்தான் வரவிருக்கும் தேர்தலில் ஆட்சியாளர் யார் என்பதை தீர்மானிக்கப்போகும் கேம் சேஞ்சராக பார்க்கப்படுகிறது. குறிப்பாக, தமிழக வெற்றிக் கழகத்தின் தலைவர் விஜய், இளைஞர்கள் மத்தியில் கொண்டுள்ள அபரிமிதமான செல்வாக்கு, இந்த புள்ளிவிவரங்களை அரசியல் கட்சிகளுக்குப் பீதியூட்டும் ஒன்றாக மாற்றியுள்ளது.
சமீபத்திய அரசியல் கருத்துக்கணிப்புகளின்படி, இந்த 2.27 கோடி இளைஞர் வாக்குகளில் சரிபாதி விஜய்க்கு விழுந்தால் கூட, அவர் சுமார் 70 முதல் 80 தொகுதிகளில் மிக எளிதாக வெற்றி பெற்றுவிடுவார் என்று கணிக்கப்படுகிறது. இது ஒரு புதிய கட்சிக்கு மிகப்பெரிய தொடக்கமாக அமையும்.
இந்த இளைஞர் வாக்குகள் ஒரு வலுவான அடித்தளத்தை அமைத்து கொடுத்த பிறகு, அதன் மீது அமையும் மற்ற வாக்குகளே விஜய்யின் ஆட்சிக்கான பாதையை செப்பனிடும். குறிப்பாக, சிறுபான்மையினர் வாக்குகள், பெண்களின் ஆதரவு மற்றும் ஆளுங்கட்சியான திமுக மீது அதிருப்தியில் உள்ள பொதுமக்களின் வாக்குகள் ஆகியவை விஜய்க்கு சாதகமாகத் திரும்பினால், தமிழகத்தில் ஒரு புதிய ஆட்சி அமைவது நிச்சயம் என்று அரசியல் விமர்சகர்கள் கருதுகின்றனர்.
மொத்தத்தில் தமிழக அரசியல் என்பது வெறும் உணர்ச்சிகளால் மட்டும் தீர்மானிக்கப்படுவதில்லை, அது மிகத்துல்லியமான வாக்கு வங்கி கணக்குகளையும் உள்ளடக்கியது. 5.67 கோடி வாக்காளர்களில் இந்த 40 சதவீத இளைஞர்கள் எடுக்கப்போகும் முடிவுதான் தமிழகத்தின் அடுத்த ஐந்து ஆண்டுகால விதியை எழுதப்போகிறது.