2026 தமிழக சட்டமன்ற தேர்தல் முடிவுகளுக்கு பிறகு, மாநிலத்தின் அரசியல் களம் தலைகீழாக மாறியிருக்கிறது. பல தசாப்தங்களாக தமிழகத்தை மாறி மாறி ஆண்டு வந்த பாரம்பரிய திராவிட கட்சிகளின் ஏகபோக ஆதிக்கத்திற்கு முற்றுப்புள்ளி வைக்கும் விதமாக, புதிய மாற்று சக்தியாக உருவெடுத்துள்ள முதலமைச்சர் விஜய் தலைமையிலான தமிழக வெற்றி கழகம் அரியணையில் ஏறியுள்ளது. இந்த ஆட்சி மாற்றமானது, தற்போதைய நிலையில் பிரதான எதிர்க்கட்சியாக கூட செயல்பட முடியாத அளவுக்கு பலவீனமடைந்துள்ள அதிமுகவின் சட்டமன்ற உறுப்பினர்கள் மத்தியில் ஒரு மிகப்பெரிய மனமாற்றத்தையும், தங்களது எதிர்காலம் குறித்த அச்சத்தையும் ஏற்படுத்தியுள்ளது.
அதிமுகவின் தற்போதைய நிலையை உற்றுநோக்கும்போது, அக்கட்சியில் எம்.எல்.ஏவாக நீடிப்பதில் எந்தவொரு அரசியல் பயனும் இல்லை என்ற விரக்தி அடிமட்ட அளவில் இருந்து இரண்டாம் கட்ட தலைவர்கள் வரை பரவியுள்ளது. “எதிர்க்கட்சியாக கூட இல்லாமல் என்ன செய்வது, நமது அரசியல் எதிர்காலம் என்ன?” என்ற கேள்வி அவர்களுக்குள் எழுந்துள்ளது. மற்றொருபுறம், பாரம்பரியப் பலம் கொண்ட திமுக பக்கம் போகலாம் என்று யோசித்தால், கடந்த தேர்தலில் கொளத்தூர் தொகுதியில் அக்கட்சியின் தலைவர் மு.க.ஸ்டாலின் தோல்வியடைந்தது முதல், தற்போது ஆட்சியை இழந்து அடுத்தடுத்து கூட்டணிகளும் உடைந்து அந்த கட்சியே தள்ளாடிக்கொண்டிருக்கிறது. இதனால், மாற்றுப் பாதையைத் தேடும் எவருக்கும் திமுக இப்போது ஒரு பாதுகாப்பான புகலிடமாகத் தெரியவில்லை.
இத்தகைய இக்கட்டான சூழலில், தமிழக அரசியலின் எதிர்காலமாகவும், சரியான பாதையாகவும் தற்போதைய ஆளுங்கட்சியான தவெக மட்டுமே எஞ்சியிருக்கிறது என்பதை பலரும் உணர தொடங்கியுள்ளனர். “இப்போதே போய் தவெகவில் இணைந்துவிட்டால், இன்னும் ஓராண்டு அல்லது இரண்டாண்டு காலத்திற்குள் முதலமைச்சர் விஜய்யின் குட்புக்கில் இடம் பிடித்து, ஏதேனும் ஒரு முக்கிய பதவியை வாங்கிவிடலாம்; அதன் மூலம் அடுத்த பத்து வருடங்களுக்கு தங்களது அரசியல் வாழ்க்கையை எவ்வித சரிவும் இன்றி மிக கௌரவமாக ஓட்டிவிடலாம்” என்ற எதார்த்தமான எண்ண ஓட்டம் தற்போதைய நிலையில் 10-க்கும் மேற்பட்ட அதிமுக எம்.எல்.ஏக்களின் மனதில் மிக ஆழமாக ஓடிக்கொண்டிருக்கிறது.
இதன் வெளிப்பாடாகத்தான், அண்மையில் தாராபுரம் தொகுதி சத்தியபாமா, மதுராந்தகம் தொகுதி மரகதம் குமரவேல் மற்றும் பெருந்துறை தொகுதி ஜெயக்குமார் ஆகிய 3 அதிமுக எம்.எல்.ஏக்கள் தங்களது பதவிகளை அதிரடியாக ராஜினாமா செய்தனர். இந்த 3 விக்கெட்டுகள் வீழ்ந்தது வெறும் ஆரம்பம் தான் என்றும், எப்போது வேண்டுமானாலும் மேலும் 10-க்கும் மேற்பட்ட அதிமுக எம்.எல்.ஏக்கள் தங்களது பதவிகளைத் தூக்கியெறிந்துவிட்டு, சபாநாயகரிடம் ராஜினாமா கடிதத்தைக் கொடுத்துவிட்டு தவெகவின் ‘விசில்’ சின்னத்தின் கீழ் அணிவகுக்கத் தயாராக இருக்கிறார்கள் என்றும் அரசியல் வட்டாரங்கள் தெரிவிக்கின்றன.
இதனையடுத்து வரவிருக்கும் இடைத்தேர்தல்களில், ராஜினாமா செய்யும் அனைத்து தொகுதிகளிலும் தவெகவின் வேட்பாளர்கள் ‘விசில்’ சின்னத்தில் நின்று அமோக வெற்றி பெறும்போது, சட்டமன்றத்தில் தவெக அரசுக்கு தேவையான தனிப் பெரும்பான்மை பலம் எவ்வித தடையுமின்றி முழுமையாகக் கிடைத்துவிடும். தவெகவிற்கு முறையான மெஜாரிட்டி கணக்கு வந்துவிட்டால், “ஆட்சிக்கு ஆதரவு தருவதை மறுபரிசீலனை செய்வோம்” என்று கூறி ஆளுங்கட்சியைத் தங்களது கட்டுப்பாட்டில் வைக்க நினைக்கும் எந்தவொரு கூட்டணி கட்சியும் யோசிக்கும்.
தமிழக அரசியல் வரலாற்றில் ஐம்பது ஆண்டுகாலமாக வேரூன்றிப் படர்ந்திருந்த “திராவிட அரசியல்” என்ற சித்தாந்தக் கட்டமைப்பை முற்றிலும் வேரறுத்து, தூய்மையான மக்கள் நல அரசியலை நிலைநாட்டப் பிறந்த கட்சியாகவே தற்போதைய தவெக பார்க்கப்படுகிறது. அதிமுக, திமுக என இரு துருவங்களாக பிரிந்து கிடந்த தமிழகத்தை, தங்களது ஒற்றை அரசியல் அலை மூலம் மாற்றி அமைத்த தவெக தொண்டர்கள், “திராவிடத்தை அழிக்க பிறந்த கட்சிடா தவெக” என்று தங்களது அரசியல் வெற்றியை மிகக் கெத்தாக கொண்டாடி வருகின்றனர். காலத்தின் கட்டாயத்திற்கு ஏற்ப தவெகவை நோக்கி நகரும் இந்த அரசியல் மறுசீரமைப்பு, வரும் காலங்களில் தமிழகத்தின் ஒட்டுமொத்த பாதையையும் புதிய வெளிச்சத்தை நோக்கி எடுத்து செல்ல போவது மட்டும் உறுதி.