தமிழக வெற்றி கழகத்தின் அண்மைய தேர்தல் வெற்றி என்பது இந்திய அரசியல் வரலாற்றிலேயே இதுவரை யாரும் கையாண்டிடாத ஒரு புதிய டிஜிட்டல் புரட்சியாக பார்க்கப்படுகிறது. பாரம்பரிய அரசியல் கட்சிகள் அனைத்தும் தங்களின் வழக்கமான தேர்தல் யுக்திகளான பிரம்மாண்ட பொதுக்கூட்டங்கள், பண விநியோகம், வீடு வீடாக சென்று துண்டு பிரசுரங்கள் வழங்குதல் போன்ற பழைய பாணிகளையே நம்பி கொண்டிருந்த வேளையில், தவெக அதில் ஒரு சதவீதம் கூட பின்பற்றவில்லை என்பதுதான் வியப்பான உண்மை. பழைய அரசியல் சித்தாந்தங்களுக்கு பின்னால் ஓடாமல், முற்றிலும் மாறுபட்ட ஒரு நவீன தொழில்நுட்ப பாதையை தேர்ந்தெடுத்து, அதன் மூலம் மிக துல்லியமாக தேர்தல் களத்தை அக்கட்சி தங்களுக்கு சாதகமாக மாற்றியமைத்து கொண்டது.
இந்த மாபெரும் டிஜிட்டல் வெற்றிக்கான அடித்தளம் என்பது தவெகவின் தனித்துவமான பிரச்சார உத்தியில் தான் அடங்கியிருக்கிறது. பொதுவாக ஒரு கட்சி தலைவன் மேடையில் ஏறி “நான் உங்களுக்கு நல்லது செய்வேன்” என்று தனக்கு தானே தம்பட்டம் அடிப்பதுதான் வழக்கம். ஆனால், விஜய் அவர்கள் அந்த பாதையைத் தேர்ந்தெடுக்கவில்லை; மாறாக, “விஜய் ஆட்சிக்கு வந்தால் நமக்கு நல்லது நடக்கும்” என்ற எண்ணத்தை மக்கள் மனங்களாகவே முன்வந்து பேச வைக்கும் ஒரு மறைமுகமான மற்றும் ஆழமான உளவியல் தாக்கத்தை அவரது தொழில்நுட்ப குழுவினர் மக்கள் மத்தியில் மிக நேர்த்தியாக உருவாக்கினர். தலைவன் பேசுவதை விட, தன்னை சுற்றியிருக்கும் சாமானிய மக்கள் பேசும் போது அதன் நம்பகத்தன்மை பல மடங்கு அதிகரிப்பதை இந்த உத்தி நிரூபித்து காட்டியுள்ளது.
இந்த பிரச்சாரத்தை அடிமட்ட அளவில் கொண்டு சேர்க்க தவெக கையாண்ட இன்ஸ்டாகிராம் உத்திதான் இந்தத் தேர்தலின் மாஸ் திருப்புமுனையாகும். தமிழ்நாட்டின் ஒரு சட்டமன்ற தொகுதிக்கு மட்டுமே சுமார் 25 பிரத்யேக இன்ஸ்டாகிராம் பக்கங்கள் மிக திட்டமிட்டு தொடங்கப்பட்டன. அப்படியென்றால், மாநிலத்தின் ஒட்டுமொத்த 234 தொகுதிகளுக்கும் எவ்வளவு பக்கங்கள் இயங்கியிருக்கும் என்பதை நாம் கணக்கிட்டு பார்த்துக் கொள்ள வேண்டும். இந்த அதிரடி திட்டம் ஒட்டுமொத்த சமூக வலைத்தள உலகையே தவெகவின் கட்டுப்பாட்டுக்குள் கொண்டு வந்ததுடன், மாற்று அரசியல் தரப்பினரால் கணிக்கவே முடியாத ஒரு டிஜிட்டல் வியூகமாக உருவெடுத்தது.
இதன் செயல்பாட்டு முறை இன்னும் வியப்பளிக்க கூடியதாக அமைந்திருந்தது. இந்த 5,000க்கும் மேற்பட்ட பக்கங்களில் இருந்து தினசரி ஒரு பக்கத்திற்கு இரண்டு வீடியோக்கள் வீதம், ஒட்டுமொத்தமாக நாளொன்றுக்கு சுமார் 10,000 ரீல்ஸ் வீடியோக்கள் சமூக வலைத்தளங்களில் இடைவிடாது அப்லோடு செய்யப்பட்டன. இதில் வேடிக்கை என்னவென்றால், அந்தந்த பகுதிகளில் போட்டியிட்ட லோக்கல் வேட்பாளர்கள் மேடைகளிலோ அல்லது பொது இடங்களிலோ எதுவுமே பேசவில்லை. அவர்களை பற்றிய சிறப்பம்சங்கள், அவர்களின் பின்னணி மற்றும் அவர்களின் மக்கள் நல பணிகள் என அனைத்தையுமே இந்த இன்ஸ்டாகிராம் வீடியோக்கள் மட்டுமே 24 மணி நேரமும் பொதுமக்களிடம் பேசி கொண்டே இருந்தன.
இந்த 5,000 பக்கங்களை நிர்வகித்தவர்களும் சாதாரணமாக இயங்கவில்லை; அவர்கள் ஒருவருக்கொருவர் ஒருங்கிணைந்து இந்த வீடியோக்களை தீவிரமாகப் Share செய்து ஒரு மிகப்பெரிய டிஜிட்டல் சங்கிலித்தொடரை உருவாக்கினர். இந்த வீடியோக்களின் தரம் மற்றும் எடிட்டிங் ஸ்டைல் இளைஞர்களைக் கவரும் வகையில் இருந்ததால், ஒரு கட்டத்தில் கட்சித் தொண்டர்களைத் தாண்டி சாமானிய பொதுமக்களும், குறிப்பாக இளைய தலைமுறையினரும் இந்த வீடியோக்களைத் தங்களின் சொந்தப் பக்கங்களில் தானாகவே முன்வந்து பகிரத் தொடங்கினர். எப்போது பொதுமக்கள் தங்களின் சொந்த விருப்பத்தின் பேரில் ஒரு கட்சியின் உள்ளடக்கத்தைப் பகிரத் தொடங்குகிறார்களோ, அப்போதே அந்தப் பிரச்சாரம் மக்களின் அலை அலையாக மாறிவிடுகிறது.
பொதுமக்களின் இந்தத் தீவிரப் பகிர்வுக்குப் பிறகு சமூக ஊடகங்களில் வேறென்ன நடக்கும், தவெகவின் தேர்தல் சின்னமான ‘விசில்’ சின்னத்தின் தீப்பொறி ஒட்டுமொத்த இணையப் பக்கங்களையும் பற்றிக்கொண்டது. பாரம்பரிய ஊடகங்களின் துணையின்றி, கோடிக்கணக்கான விளம்பரச் செலவுகளின்றி, வெறும் ஸ்மார்ட்போன்களையும் இன்ஸ்டாகிராம் பக்கங்களையும் மட்டுமே ஆயுதமாகக் கொண்டு நிகழ்த்தப்பட்ட இந்த நவீன டிஜிட்டல் புரட்சிதான் தமிழக வெற்றிக் கழகத்தின் இமாலய வெற்றியின் உண்மையான மற்றும் ரகசியமான சூத்திரமாகும். இந்தத் தேர்தல் யுக்தி எதிர்கால இந்திய அரசியலுக்கே ஒரு புதிய வழிகாட்டியாக மாறியுள்ளது என்பதில் எவ்வித சந்தேகமும் இல்லை.