எடப்பாடி பழனிசாமி முதல்வராக இருந்தவர், எதிர்க்கட்சி தலைவராக இருந்தவர் இப்போது வெறும் எம்.எல்.ஏ மட்டுமே… 15 தோல்வி பழனிசாமிக்கு இப்போது இரண்டே இரண்டு சாய்ஸ்தான்.. ஒன்று கட்சி தலைமையை விட்டு கொடுக்கனும்.. அப்ப தான் கட்சியை ஓரளவாவது காப்பாற்ற முடியும்.. அல்லது தலைமை தான் முக்கியம் எத்தனை பேர் போனால் போகட்டும் என்ற முடிவெடுத்தால் 2031ல் கட்சி இருக்காது.. கட்சியை காப்பாற்ற போகிறாரா? அல்லது வெறும் பொதுச்செயலாளர் என்ற பதவியை மட்டும் காப்பாற்ற போகிறாரா?
2021 வரை மாநிலத்தின் முதலமைச்சராக அதிகாரம் செலுத்தி, 2021க்கு பின்னர் சட்டசபையின் எதிர்க்கட்சித் தலைவராகக் கம்பீரமாக வலம் வந்த எடப்பாடி கே. பழனிசாமி, இன்றைக்கு வெறும் சட்டமன்ற உறுப்பினராக மட்டுமே சுருங்கி நிற்கும் நிலைக்குத் தள்ளப்பட்டுள்ளார். இடைத்தேர்தல்கள், நாடாளுமன்றத் தேர்தல், உள்ளாட்சித் தேர்தல் என வரிசையாக 15 தொடர் தோல்விகளைச் சந்தித்த பிறகும், அதிமுகவின் தலைமைப் பொறுப்பில் அவர் தொடர்வது கட்சியின் எதிர்காலத்தையே கேள்விக்குறியாக்கியுள்ளது. தொடர் சரிவுகளால் நிலைகுலைந்து போயிருக்கும் அதிமுகவை மீட்பதற்கு இபிஎஸ் அவர்களுக்கு முன்னால் இப்போது இரண்டே இரண்டு வழிகள் மட்டுமே எஞ்சியிருக்கின்றன.
முதலாவது வழி, தனது சுயநலத்தையும் பதவி ஆசையையும் துறந்து, கட்சியின் நலனைக் கருதி தலைமைப் பொறுப்பை உடனடியாக வேறு ஒரு வலுவான தலைமையிடம் ஒப்படைப்பதாகும். எடப்பாடி பழனிசாமி தனது அதிகாரத்தை விட்டுக் கொடுத்து, கட்சியை ஒருங்கிணைக்கக்கூடிய ஒரு புதிய தலைமைக்கு வழிவிட்டால் மட்டுமே, தொண்டர்களிடையே மீண்டும் புதிய நம்பிக்கையை விதைத்து, சரிந்து கிடக்கும் அதிமுகவை ஓரளவாவது காப்பாற்ற முடியும். தொடர் தோல்விகளால் சோர்ந்துபோயிருக்கும் அடிமட்டக் தொண்டர்களை உற்சாகப்படுத்தவும், பிரிந்து சென்ற சக்திகளை மீண்டும் ஒன்றிணைக்கவும் தலைமை மாற்றம் ஒன்றே தற்போதைய அவசரத் தேவையாக உருவெடுத்துள்ளது.
இரண்டாவது வழி, “கட்சியின் முகவரி அழிந்தாலும் பரவாயில்லை, எத்தனை முக்கிய நிர்வாகிகள் மற்றும் எம்.எல்.ஏக்கள் விலகிப் போனாலும் கவலையில்லை, பொதுச்செயலாளர் என்ற பதவி மட்டுமே எனக்கு முக்கியம்” என்று பிடிவாதம் பிடிப்பதாகும். ஒருவேளை இபிஎஸ் இந்த இரண்டாவது வழியைத் தேர்ந்தெடுத்தால், 2031-ஆம் ஆண்டு வரவிருக்கும் சட்டமன்றத் தேர்தலில் போட்டியிடுவதற்கு ‘அதிமுக’ என்ற ஒரு இயக்கமே முகவரி இல்லாமல் காணாமல் போவது முற்றிலும் தவிர்க்க முடியாததாகிவிடும். தலைமை மீதான அதிருப்தியால் நிர்வாகிகள் மற்றும் தொண்டர்கள் கூட்டம் கூட்டமாக தவெக உள்ளிட்ட மாற்று முகாம்களை நோக்கி நகர்வது தொடர்கதையாகிவிடும்.
தற்போது அரங்கேறி வரும் இடைத்தேர்தல் முடிவுகளும், கள நிலவரங்களும் எடப்பாடி பழனிசாமியின் அரசியல் தலைமைத்துவத்திற்கு வைக்கப்பட்ட முற்றுப்புள்ளியாகவே பார்க்கப்படுகின்றன. சொந்தக் கோட்டைகளாகக் கருதப்பட்ட தொகுதிகளிலேயே கட்சி மூணாவது இடத்திற்குத் தள்ளப்பட்ட பிறகும், தோல்விக்கான பொறுப்பேற்காமல் பதவி நாற்காலியைப் பிடித்துக் கொண்டு தொங்குவது கட்சிக்கு செய்யும் மாபெரும் துரோகம் என்ற கொந்தளிப்பு அதிமுகவின் அடிமட்ட ரத்தத்தின் ரத்தங்கள் மத்தியிலேயே வெடித்துச் சிதறி வருகிறது.
எனவே, எடப்பாடி பழனிசாமி இப்போது தனது அரசியல் வாழ்வின் மிக முக்கியமான வரலாற்றுச் சந்திப்பில் நின்று கொண்டிருக்கிறார். எம்.ஜி.ஆர் கட்டிக்காத்த, ஜெயலலிதா வளர்த்தெடுத்த இந்த இயக்கத்தைக் காப்பாற்றப் போகிறாரா? அல்லது வெறும் ‘பொதுச்செயலாளர்’ என்ற போலிப் பதவியையும் அதிகாரத்தையும் மட்டும் காப்பாற்றிக் கொண்டு கட்சியின் அழிவுக்குக் காரணகர்த்தாவாக மாறப்போகிறாரா? என்ற கேள்விக்கான விடையை அவரது அடுத்தகட்ட முடிவுதான் தீர்மானிக்கப் போகிறது.
காலம் மிக வேகமாக ஓடிக்கொண்டிருக்கிறது; அதிலும் குறிப்பாக தவெகவின் அசுரத்தனமான வளர்ச்சி திராவிடக் கட்சிகளின் பாரம்பரிய வாக்கு வங்கிகளை அடியோடு தகர்த்து வருகிறது. இந்தச் சூழலில், இனியும் தாமதிக்காமல் இபிஎஸ் தனது பிடிவாதத்தைத் தளர்த்தி தலைமை மாற்றத்திற்கு வழிவிடாவிட்டால், அதிமுக என்ற பேரியக்கத்தின் இறுதி அத்தியாயத்தை அவரே தன் கையால் எழுதிய சோகம் நிகழ்ந்துவிடும் என்பதில் எந்தவொரு மாற்றுக்கருத்தும் இல்லை.