மக்களாட்சி தத்துவத்தின்படி, பெரும் பெரும்பான்மையுடன் மக்களால் தேர்ந்தெடுக்கப்பட்ட ஒரு அரசை, பதவியேற்ற ஒரே மாதத்திற்குள் எப்படியாவது கவிழ்த்துவிட வேண்டும் என்று நினைப்பது அரசியல் வன்மத்தின் உச்சமாகவே பொதுமக்களால் பார்க்கப்படுகிறது. ஜனநாயக முறையில் மக்கள் அளித்த தீர்ப்பை மதிக்காமல், குறுக்கு வழியில் ஆட்சியைப் பிடிக்கத் துடிப்பது ஆரோக்கியமான அரசியல் பண்பாடு அல்ல. ஒரு புதிய அரசு பொறுப்பேற்றுள்ள நிலையில், அதுவும் இதற்கு முன் எந்தவொரு அரசியல் பின்னணியும் இல்லாத முற்றிலும் ஒரு புதிய கட்சியின் அரசு நிர்வாகத்திற்கு வந்திருக்கும் பொழுது, அவர்கள் செயல்படுவதற்கு ஓரளவாவது கால அவகாசம் கொடுக்கப்பட வேண்டும் என்பதே நடுநிலையாளர்களின் கருத்தாக உள்ளது.
எந்தவொரு புதிய அரசாக இருந்தாலும், அதன் செயல்பாடுகளையும் திட்டங்களையும் முழுமையாகப் புரிந்துகொண்டு மதிப்பிடுவதற்கு குறைந்தபட்சம் ஆறு மாதங்கள் முதல் ஒரு வருடம் வரையிலாவது கால அவகாசம் கொடுப்பதுதான் நியாயமான முறையாகும். அந்தத் குறிப்பிட்ட காலத்திற்குப் பிறகும் அந்த அரசு தவறு செய்தால் அல்லது மக்களின் எதிர்பார்ப்புகளை நிறைவேற்றத் தவறினால், தாராளமாக விமர்சனங்களை முன்வைக்கலாம்; மக்கள் மன்றத்தில் கேள்வி எழுப்பலாம். அதை விடுத்து, ஆட்சிப் பொறுப்பேற்ற முப்பது நாட்களுக்குள்ளேயே பழிவாங்கும் நோக்கத்தோடும், அரசியல் பொறாமையோடும் ஆட்சியை கலைக்க முயல்வது, மக்களின் வாக்குகளைக் கொச்சைப்படுத்தும் செயலாகவே அமையும்.
இத்தகைய குறுகிய காலத்திற்குள்ளேயே, பல்வேறு சவால்களுக்கு மத்தியிலும் தமிழக வெற்றிக் கழக அரசு பல அதிரடியான நற்பணிகளையும் சாதனைகளையும் செய்து வருகிறது என்பதுதான் யதார்த்தமான உண்மை. குறிப்பாக, அரசு நிர்வாகத்தில் புரையோடிப் போயிருந்த ஊழலை இந்த அரசு படிப்படியாகக் குறைத்து வருகிறது. இதுவரை காலங்காலமாக நடைமுறையில் இருந்த ‘பார்ட்டி ஃபண்ட்’ எனப்படும் கட்சி நிதியை வாங்குவதை முற்றிலும் நிறுத்தி, அரசு கஜானாவிற்கு நேர்மையாகச் செயல்பட வழிவகை செய்துள்ளது. இதன் மூலம் அரசியல் தலையீடுகள் இல்லாத ஒரு சுமுகமான நிர்வாகச் சூழல் தமிழகத்தில் உருவாகத் தொடங்கியுள்ளது.
அரசு ஊழியர்கள் மற்றும் ஆசிரியர்களின் இடமாறுதலில் நிலவி வந்த லஞ்ச லாவண்யங்களை ஒழித்து, ஒரு பைசா கூட வாங்காமல் முற்றிலும் தகுதி மற்றும் நேர்மையின் அடிப்படையில் ஆன்லைன் மூலம் டிரான்ஸ்பர் செய்யும் முறையைக் கொண்டு வந்து இந்த அரசு அசத்தியுள்ளது. அதேபோல, தனியார் மற்றும் அரசுப் பள்ளிகளுக்கான புதிய அனுமதிகள் மற்றும் அங்கீகாரங்களை எவ்வித ரகசியக் கட்டணங்களும் லஞ்சமும் இல்லாமல், மிக எளிதாகப் பெறும் வகையில் வழிவகை செய்யப்பட்டுள்ளது. இந்த குறுகிய கால மாற்றங்கள் அனைத்தும் அரசுத் துறைகளில் சாமானிய மக்களுக்கும் அதிகாரிகளுக்கும் இடையே ஒரு புதிய நம்பிக்கையை ஏற்படுத்தியுள்ளது.
இந்த அதிரடியான நல்ல விஷயங்களையும், மக்கள் மத்தியில் தவெக அரசுக்கு பெருகி வரும் நற்பெயரையும் தாங்கிக் கொள்ள முடியாமல்தான், ஆட்சியை எப்படியாவது கலைக்க வேண்டும் என்று திமுக மற்றும் அதிமுக ஆகிய இரு திராவிடக் கட்சிகளும் தீவிரமாக முயன்று வருகின்றன. தங்களின் அறுபது ஆண்டுகால அரசியல் சாம்ராஜ்யம் இந்த ஒரு மாத கால ஆட்சியில் ஆட்டம் கண்டுவிட்டதோ என்ற அச்சமே இத்தகைய அவசரக் கவிழ்ப்பு முயற்சிகளுக்குக் காரணமாகும். ஆனால், இத்தகைய எதிர்மறை அரசியலைத் தொடர்ந்து முன்னெடுத்தால், வரவிருக்கும் உள்ளாட்சித் தேர்தலில் இரு திராவிடக் கட்சிகளும் மக்கள் மத்தியில் பயங்கரமான அடி வாங்குவது உறுதி என்று அரசியல் நிபுணர்கள் எச்சரிக்கிறார்கள்.
ஏற்கனவே திமுகவின் கூட்டணியில் இருந்த முக்கியக் கட்சிகள் அனைத்தும் தற்பொழுது தமிழக வெற்றிக் கழகத்தின் பக்கம் அணிவகுத்து வந்துவிட்ட நிலையில், திமுக தற்பொழுது கூட்டணியின்றி தனித்து விடப்பட்டுள்ளது. இத்தகைய பலவீனமான சூழ்நிலையில், மக்கள் செல்வாக்கு பெற்ற ஒரு அரசை வீழ்த்த நினைக்கும் வேலைகளில் திமுக தொடர்ந்து ஈடுபட்டால், வரவிருக்கும் உள்ளாட்சித் தேர்தலில் ஒரு வார்டு கவுன்சிலர் கூட அந்தக் கட்சிக்குக் கிடைக்காமல் போகும் என்பதே தற்போதைய நிதர்சனமான உண்மையாகும். இதை உணர்ந்து கொண்டு, இனிமேலாவது சுயநல அரசியலை விடுத்து, மக்கள் நலனுக்காக நேர்மறையான வழியில் செயல்பட வேண்டும் என்று அரசியல் விமர்சகர்கள் அறிவுரை கூறுகிறார்கள்.